Бу күннэргэ ардахтар түһүүлэрэ уҕараан улууспут отчуттара үлэлэрэ-хамнастара ыраатта.
Атырдьах ыйын 18 күнүнээҕи көрдөрүүнэн, 44369 туонна оту бэлэмниэхтээх былааннарыттан нэһилиэктэр билиҥҥитэ 76,2 бырыһыаны толордулар, 33824,7 туонна кэбиһилиннэ, рулоннанна. Өрөспүүбүлүкэҕэ биир бастыҥ көрдөрүүлээхтэр ортолоругар иһэбит.
Сорох нэһилиэктэр былааннарын хайы-үйэ ырааҕынан куоһардылар. Онон кыстыгы туоруур отторун саппаастаах көрсөр кыахтаннылар. Ол курдук, Араҥас нэһилиэгэ 103, Бүтэйдээх 111, Дьаҥхаады 120, Холгума 143, Чыамайыкы 120 бырыһыан толордулар. Атын нэһилиэктэртэн Баатара 82, Доллу 85, Дойду 95, Мөҥүрүөн 89, Нөөрүктээйи 91, 1-кы Тыыллыма 84 бырыһыан буолбут.