Мэҥэ Хаҥалас улууһугар Марина Попова аатынан Майатааҕы оҕо ускуустубатын оскуолатыгар сокуону кэһиини сэрэтэр уруһуй куонкуруһун түмүгүн таһаардылар.
Оҕо ускуустубатын оскуолатыгар художественнай кылааска оҕолору 10 саастарыттан ылаллар. Үөрэнээччилэр оскуоланы бүтэрэллэригэр ойуулуур-дьүһүннүүр уонна декоративнай-прикладной ускуустуба төрүттэрин баһылыыллар. Уопуттаах преподавателлэр оҕолору биэс сылтан ордук сүрүн диссипилиинэлэргэ, ол курдук академическай уруһуйга, живописька, станковай уонна декоративнай композицияҕа үөрэтэллэр. Ускуустуба устуоруйатын, скульптураны, о.д.а. үөрэтэллэр. Үөрэнээччилэр акварель, гуашь, пастель, арыы уонна араас графическай инструменнарынан үлэлииллэр.
Оҕолор сылын ахсын араас куонкурустарга кытталлар уонна бириистээх миэстэлэри ылаллар. Улуус баһылыгын солбуйааччыта Василий Филиппов уонна “Азбука” хампаанньа бэрэстэбиитэлэ Елена Николаева сокуону кэһиини сэрэтэр уруһуй куонкуруһун кыайыылаахтарыгар бэлэхтэри туттардылар.
Зоя Герасимова.
