Балаҕан ыйын 2-6 күннэригэр Кыргызстан өрөспүүбулукэтигэр VI Аан дойдутааҕы «Игры кочевников» күрэс иһинэн тэриллэн ыытыллыбыт «Сказание кочевников ‒ Наследие кочевников» норуоттар эпостарын толорооччуларын күөн көрсүһүүлэрэ буолан ааста.
СӨ «Аартыкатааҕы эпос уонна ускуустуба киинэ» Саха сириттэн Мэҥэ Хаҥалас улууһуттан Аксинья Степанованы уонна Виталий Никифоровы тэрийэн ыыттылар. «Игры кочевников» улахан түһүлгэтигэр 27 дойдуттан эпоһы уонна норуот үнүстүрүөмэннэригэр төрүт дорҕоон, тыас-уус, норуот ырыаларын 60 аатырар толорооччулара кытыннылар.
«Сказание кочевников ‒ Наследие кочевников» күрэс Иссык Куль Ытык Эбэ Кырчын хонуутугар тэриллибит этногородокка ыытылынна. Олус долгутуулаах улахан аан дойду ааттаахтара ааттаан-суоллаан кыттар күрэстэригэр Сахабыт сирин ааттатар олоҥхону толорор бастыҥ ыччаттарбыт Аксинья Степанова, Виталий Никифоров эрдэттэн бэлэмнэнэн үрдүк таһымҥа толордулар. Кинилэр олоҥхону толорууга, тойукка маастар кылаастары ыыттылар, норуоттар сомоҕолоһууларын көрдөрөр кэнсиэргэ кытыннылар. Улахан күрэскэ ыам ыйыттан Кыргызстан өрөспүүбүлукэтин Култуураҕа министиэристибэтин, «Игры кочевников» аан дойдутааҕы күрэһи тэрийэр хамыыһыйаны кытта СӨ «Аартыкатааҕы эпос уонна үскуустуба киинэ» эпическэй нэһилиэстибэ салаатын салалтата кэпсэтэн ыҥырдылар. Ыраах дойдуга тиийэн саха норуотун олоҥхотун толорон көрөөччүлэр сэҥээриилэрин ыллылар.
Виталий Никифоров «Сказание кочевников ‒ Наследие кочевников» аан дойдутааҕы таһымнаах улахан күрэскэ үһүс үрдэл кыайыылааҕын аатын ылла. Аксинья Степанова тэрийэр хамыыһыйа сэртипикээтин, Махтал суругун тутта.
Киэн туттар ыччаттарбытын ситиһиилээх кытыыларынан итиитик-истиҥник Аартыкатааҕы эпос уонна ускуустуба киинин аатыттан эҕэрдэлиибит. Ыччаттарбытынан киэн туттабыт, инники айар үлэлэригэр үрдүктэн үрдүк ситиһиилэри баҕарабыт.
Евдокия Иванова.