Атырдьах ыйын 15-тэн балаҕан ыйын 1 күнүгэр диэри дойду үрдүнэн ыытыллар “Үөрэнэ барар оҕоҕо көмөлөс” аахсыйа чэрчитинэн Мэҥэ Хаҥалас улууһун дьаһалтата улуус социальнай өттүнэн кыһалҕалаах дьиэ кэргэннэригэр үөрэнээччилэрин ахсаанынан оскуола тэриллэрин бэлэх уунар.
Бүгүн, атырдьах ыйын 19 күнүгэр, Аллараа Бэстээххэ итиэннэ Майа сэлиэнньэтигэр тэҥинэн ыытылла турар тэрээһиҥҥэ Мэҥэ Хаҥаластааҕы сокуоннай саастарын ситэ илик оҕолору социальнай-реабилитациялыыр киин үлэһиттэрэ улууспут дьаһалтатын бэлэҕин дьиэ кэргэттэргэ көхтөөхтүк түҥэтиини саҕалаатылар. 1-кы Наахара нэһилиэгин баһылыга Иннокентий Исаков нэһилиэгин ыалларыгар анаммыт бэлэхтэри биир бастакынан сылдьан ылан барда.
Саҥа үүнэр 2024-2025 үөрэх дьылыгар үөрэнээччилэргэ элбэх билиини сомсоллоругар, учууталларга болҕомтолоох үөрэнээччилэри, төрөппүттэргэ оҕолоро ситиһиилээхтик үөрэнэллэригэр баҕарабыт.
Марелла Баишева.
