Роман Плотников,
Майатааҕы киин балыыһа үрдүк категориялаах анестезиолог-реаниматолог бырааһа, СӨ үтүөлээх бырааһа, РФ доруобуйа харыстабылын туйгуна:
— Өрөспүүбүлүкэ төрүттэммит күнүн көрсө Ил Дархан Айсен Николаев быһа эпииргэ этиитин, дьон-сэргэ ыйытыыларыгар хоруйун биһирээн иһиттим. Доруобуйа харыстабылын туһунан кэрчиктэргэ тохтоотоххо, анал национальнай бырайыак иитинэн улахан тутуулар бардылар, олоххо киирдилэр. Буолаары буолан, киин куоракка эрэ буолбакка, тыа сиригэр, бэл, хоту улуустарга аныгы ирдэбилгэ эппиэттиир эбийиэктэр арылыннылар. Ол курдук, Муомаҕа улахан, киэҥ балыыһа киирбитин, оҥоһулла сылдьыаҕыттан илэ харахпынан көрбүтүм.
Биһиэхэ Мэҥэ Хаҥаласка 1990 сыл ыам ыйыгар тутуллан киирбит таас балыыһабыт, элбэх саҥа отделениелар аһылланнар, кыараан, аныгы ирдэбилгэ эппиэттэспэт буолбута, саҥа балыыһа куорпуһа тутулларын кэтэспиппит, баҕарбыппыт ыраатта.
Онтубут бу быйылгыттан саҕаламмытын көрөн, ис сүрэхтэн үөрэн, өрө көтөҕүллэн сылдьабыт. Онон аҕыйах кэминэн саҥа дьиэҕэ-уокка, оборудованиеҕа, аппаратураҕа үлэлиирбитин саныы-саныы, испитигэр ол дьоллоох күннэри кэтэһэбит.