Бэс ыйын 26 күнүгэр 3-с Мэлдьэхси нэһилиэгэр улуус оҕолорун сайыҥҥы сынньалаҥнарын тэрийэр, кинилэри дэгиттэр сайыннарар сыалы-соругу тутуһар «Сайдыс» лааҕыр «Алмаасэргиэнбаан» АУо ыыппыт «Сайдыыга мөлүйүөн солкуобай» өрөспүүбүлүкэтээҕи куонкуруска кыайан 100 миэстэлээх саҥа амфитыйаатырын бырайыага олоххо киллэрилиннэ.
Амфитыйаатыр аһыллыытын кэрэ-бэлиэ түгэнигэр кыһыл лиэнтэни кырыйар чиэскэ «Алмаасэргиэнбаан» бырабылыанньатын бэрэссэдээтэлин солбуйааччы Федор Ноговицын, улуус дьокутааттарын Сэбиэтин бэрэссэдээтэлэ Иннокентий Андросов, улуустааҕы үөрэх управлениетын салайааччытын солбуйааччы Михаил Петров, М.Е.Попов аатынан Аллараа Бэстээх орто оскуолатын дириэктэрэ Филип Стручков уонна «Сайдыс» лааҕыр салайааччыта Айна Попова тигистилэр.
Ыҥырыылаах ыплдьыттар лааҕыр иитиллээччилэригэр, иитээччилэригэр, баһаатайдарыгар, үлэһиттэригэр истиҥ эҕэрдэлэрин тиэртилэр. «Сияющие звезды» айар хайысхалаах лааҕыр бастакы симиэнэтин иитиллээччилэрэ, баһаатайдара саҥа амфитыйаатырга ырыа ыллаан, үҥкүүлээн, сценка көрдөрөн айар дьоҕурдарын көрдөрдүлэр.
Быйыл сайын устата лааҕыр түөрт смената «Бастыҥнар хамсааһыннара» оҕо-ыччат Бүтүн Арассыыйатааҕы хамсааһынын хайысхаларынан үлэлиэхтэрэ.
Бэс ыйын 15‒28 күннэригэр лааҕыр социальнай партнера М.К.Попова аатынан Майатааҕы оҕо ускуустубатын оскуолатын учууталлара «Сияющие звезды» сезон 96 иитиллээччитин хас биирдии оҕотун айар дьоҕурун сайыннарарга 5 музыкальнай кылааһы, 12 эбии куруһуогу арыйбыттара. Оҕолору араас музыкальнай үнүстүрүмүөннэргэ оонньуурга үөрэттилэр, вокал, фольклор ансаамбылларын тэрийдилэр.
Бырайыак үлэҕэ киллэриллэригэр лааҕыр бары иитиллээччилэригэр уонна төрөппүттэригэр, баһаатайдарга, үлэһиттэргэ, куоластааһын кэмигэр бырайыагы өйөөбүттэргэ, «Алмаасэргиэнбаан», улуус дьаһалтатын, үөрэх управлениетын үлэһиттэригэр, улуус бары үөрэнээччилэригэр, олохтоохторугар лааҕыр салайааччыта Айна Кимовна махталын тиэрдэр.
Иван Лукин.
