«Сайдыс» лааҕырга оҕо култуурунай сынньанар киинэ арылынна

Михаил Егорович Попов аатынан Аллараа Бэстээх орто оскуолата үлэлэтэр улуустааҕы «Сайдыс» оҕо сынньалаҥ лааҕырыгар үөрүүлээх, дьоһун күн үүннэ.

Оҕо сайыҥҥы култуурунай-сынньалаҥ киинин арыллыыта буолла. Сынньана сылдьар оҕолор бэлиэ түгэни үөрүүнэн-көтүүнэн үллэһиннилэр. Үөрүүлээх чааска 3-с Мэлдьэхси нэһилиэгин баһылыга Мирон Свинобоев, улуустааҕы үөрэх салалтатын начаалынньыгын солбуйааччы Филипп Стручков, ⁠М.Е.Попов аатынан Аллараа Бэстээх орто оскуолатын дириэктэрэ Михаил Петров кытыннылар.

Оҕо сынньалаҥын киинэ өрүү сайда-үүнэ, чэчирии турдун! Манна мустубут хас биирдии оҕо саҥаттан саҥаны арыйдын, доҕордоһуу истиҥ иэйиитин биллин, сайын устата билиини-көрүүнү эбиннин, эрчимнээхтик сынньаннын диэн алгыспытын тиэрдэбит! Бу киин инникитин да улуус бары оҕотун түмэр, култуураны уонна успуорду тэҥҥэ дьүөрэлээн сайыннарар биир сүрүн чэчириир сирэ буолуоҕа!