Дойдубут көмүскэлигэр сылдьар биир дойдулаахтарбытыгар ананар араас хабааннаах көмө үлэтэ күннэтэ тохтообокко барар.
Майатааҕы “Түмэн” уопсастыбаннай холбоһук иһинэн үлэлиир Евдокия Семенова салайааччылаах саһыарар, харыстыыр сиэккэни баайыыга олохтоохтук ылсан үлэлиир дьон бааллар. Кинилэринэн Заредина Сосина, Александра Дашеева, Татьяна Аргунова, Татьяна Гаврильева, Анастасия Сыромятникова буолаллар. Харысхал сиэккэ оҥорооччулар күннэтэ өйүөлээх, кыптыыйдаах, таҥастаах кэлэн 10 чаастан 16 чааска диэри үлэлииллэр.
Бу күннэргэ улуустааҕы култуура управлениетын исписэлииһэ Спиридон Григорьев харысхал сиэккэҕэ анаан 9 илими, маны сэргэ, “Бизнес-инкубатор” иис сыаҕын салайааччыта Надежда Павлова, Хаатылыматтан төрүттээх Майа олохтооҕо Петр Максимов сиэккэҕэ анаан матырыйааллары аҕалан биэрдилэр.
Улуустааҕы бэтэрээн сэбиэтин солбуйааччы бэрэссэдээтэлэ Татьяна Скрябина таҥаһынан көмөлөстө, Табаҕаттан Мария Федорова 6 устуука ыстаан тигэн аҕалан туттарда, Тиэлигиттэн Людмила Петрова дьиэтигэр кааска сиэккэтин баайарга сакаас ылан барда.
Урбаанньыт Сергей Кривогорницын уопсастыбанньыктар эбиэттэригэр итии аһылыкка анаан аһынан-үөлүнэн көмөлөстө, Майа олохтоох дьаһалтата муус тиэйэн, “Родник” ыраас уу кэлэктиибэ иһэр уунан хааччыйар буоллулар.
Биир дойдулаахтарбыт этэҥҥэ эргиллэн кэлэллэригэр туруулаһан үлэлиир үтүө санаалаах дьоммутугар барҕа махтал буолуохтун!
Марелла Баишева.
