И.М.Сосин аатынан киин бибилэтиэкэҕэ «Чолбон» сурунаал тэрийиитинэн «Чолбон – өй күрэҕэ» диэн саха литэрэтиирэтигэр билиини тургутар, дьиэ кэргэнинэн ааҕарга уһуйар бэртээхэй оонньуу буолан ааста.
Быйыл Арассыыйаҕа Дьиэ кэргэн, Саха сиригэр Оҕо саас сыллара биллэриллибитинэн өрөспүүбүлүкэ 12 улууһун уонна Дьокуускай куораты хабан саха литэрэтиирэтин ордук билэр, сахалыы ааҕарын таптыыр ыалы булан таһаарарга туһуламмыт «Улахан оонньуу» бырайыак кулун тутар 4 күнүттэн саҕаланан, улуустарынан айаннаан иһэр.
Оонньууну ыыта «Чолбон» сурунаал бас эрэдээктэрэ Гаврил Андросов уонна бу оонньуу ааптара, сурунаал эппиэттиир сэкирэтээрэ Туйаара Павлова кэлбиттэр. Бу иннинэ кинилэр Чурапчы уонна Амма улуустарыгар сылдьыбыттар, кыайыылаахтары быһаарбыттар.
«Бу оонньууну биһиги ааҕар дьиэ кэргэни булан, ааттарын дьоҥҥо-сэргэҕэ ааттаары, сурунаалбыт ааҕааччыларын сэргэхситэр, кинилэргэ болҕомто биэрэр санааттан саҕалаатыбыт. Чөл олох, чөл турук диэн өйдөбүл дьон-сэргэ санаатыгар билигин ордук физическэй таһымҥа сылдьар, духуобунай таһымҥа тиийиэхпитин наада», — диэн Гаврил Андросов киирии тылыгар эттэ.
Өркөн өй улахан оонньуутугар уопсайа 5 дьиэ кэргэн кытынна. Нөөрүктээйи нэһилиэгиттэн Дайаана (Нөөрүктээйи орто оскуолатын 8 кылааһын үөрэнээччитэ), ийэтэ Наталья, эбэтэ Светлана Егоровна Захаровтар. Хаптаҕай нэһилиэгиттэн Вова Зыков (Хаптаҕай орто оскуолатын 5 кылааһын үөрэнээччитэ), ийэтэ Мария Зыкова, эбэтэ Вера Ивановна Новгородова. Майа сэлиэнньэтиттэн икки дьиэ кэргэн кытынна. Айыына Неустроева (В.П.Ларионов аатынан Майа орто оскуолатын 4 «в» кылааһын үөрэнээччитэ), аҕата Герман Неустроев, эбэтэ Александра Александровна Куприянова. Аликуо Скрябина (И.Г.Тимофеев аатынан Майатааҕы лиссиэй 10 кылааһын үөрэнээччитэ), ийэтэ Александра Скрябина, эбэтэ Матрена Григорьевна Скрябина. Төҥүлү нэһилиэгиттэн Ангелина Лазарева (Төҥүлү орто оскуолатын 2 кылааһын үөрэнээччитэ), ийэтэ Анна Лазарева, эбэтэ Елена Борисовна Птицына кытыннылар.
Оонньуу тургутуу этээбэ хайдах барарын ааптар Туйаара Павлова быһааран, бэрт сэргэхтик, тэтимнээхтик барда. Оонньуу түөрт түһүмэхтэн турар: саха литэрэтиирэтин төрүттээччилэр, бастакы норуодунай суруйааччылар, сэрии саҕанааҕы уонна кэннинээҕи литэрэтиирэ уонна билиҥҥи кэм суруйааччылара. Түһүмэхтэр араас суол ыйытыктаахтар, кыттааччылар сөптөөх хоруйу 15 сөкүүндэ иһигэр талыахтаахтар. Саамай интэриэһинэйэ, хас түһүмэх кэннэ ыытааччы тута сөптөөх эппиэти экраҥҥа таһааран иһэр. Дьэ манна сөпкө таайбыттар ытыстарын таһынан, сыыспыттар «оо» диэн айманар саҥалара иһиллэн, ким сөпкө эппиэттээбитэ биллэн истэ. Көрөөччүлэр да билиибитин кэҥэттибит.
Кыттааччылар биирдии-иккилии очукуонан быысаһан, түмүккэ кыайыылаах аатын Нөөрүктээйи нэһилиэгиттэн кэлбит Захаровтар дьиэ кэргэн ылла уонна улуус чиэһин көмүскүү Дьокуускай куоракка баран кыттыыны ылар чиэскэ тигистэ. Финал саха тэлэбиидэнньэтигэр көстүөхтээх. Онно кыайбыт дьиэ кэргэн Өлүөнэ очуостарыгар сынньанар путевканан наҕараадаланар.
Кэлэн билиилэрин өркөн өй улахан оонньуутугар тургуппут дьиэ кэргэттэр бары тyohy суруктары туттулар, онтон кыайыылаахтар бэлиэ суруктары, бараммат баай – кинигэ бэлэҕи туттулар.
Оонньуу салгыы Сунтаар улууһугар айаннаата.
Елизавета Неустроева
