Атырдьах ыйын 21 күнүгэр Аллараа Бэстээххэ тимир суолунан Беларусь Өрөспүүбүлүкэтиттэн бастакы икки контейнер айаннаан кэллэ. Бу Саха сирин уонна Беларусь икки ардыларыгар тырааныспар-логистика сибээһин сайыннарыыга улахан суолталаах түһүмэх буолла.
Саха Өрөспүүбүлүкэтин Ил Дархана Айсен Николаев тимир суол тырааныспарынан таһаҕаһы быһаччы тиэйиини тэрийии табаар эргиирин элбэтиэҕэ уонна дьыалабыай сибээстэри бөҕөргөтүөҕэ диэн бэлиэтээн турар.
«Минскэй – Столбовой – Аллараа Бэстээх» тимир суол быһа хайысхата логистиканы судургутутар, тиэрдии болдьоҕун 20 сууккаҕа диэри сарбыйар, тырааныспар ороскуотун аччатар уонна тиэйии туруктаах буолуутун хааччыйар. Ити барыта өрөспүүбүлүкэ олохтоохторугар табаар бүтэһиктээх сыанатын намтатыыга туһуланар.
Алексей Местников, «Саха сирин тимир суоллара» аахсыйалаах хампаанньа генеральнай дириэктэрин солбуйааччы:
– Бүгүҥҥү тэрээһин олус улахан суолталаах, Беларусь Өрөспүүбүлүкэтиттэн икки улахан контейнер кэллэ. Ил Дархан биһиги тэрилтэбитигэр Беларусь Өрөспүүбүлүкэтин табаары оҥорор тэрилтэлэрин брородууксуйаларын быһалыы аҕаларга сыал-сорук туруорбута. От ыйын 29 күнүгэр биһиги бэйэбит бэрэстэбиитэлистибэбитин арыйан, Беларусь уонна Саха сирин тэрилтэлэрин икки ардыларыгар сибээс олохтообуппут. Ол үлэбит түмүгүнэн бу бастакы таһаҕаспыт кэллэ. Үлэ кылгас бириэмэҕэ этэҥҥэ ааста. Онон Саха сирин, Мэҥэ Хаҥалас урбаанньыттарыгар туһаайан бу олохтоммут сөбүлэҥҥэ олоҕуран, сөпкө туһанан, Беларусь табаары оҥорор тэрилтэлэрин кытта быһалыы сибээстэһэн, дуогабардаһан, түргэнник аҕалан, нэһилиэнньэни үрдүк хаачыстыбалаах бородууксуйанан хааччыйалларыгар баҕарабын, — диэн бэлиэтээтэ.
Иван Лукин.
