Кэрэ эйгэтигэр
Тыыннаах муусука ураты тыына, дорҕооно киһи сүрэҕин-быарын ортотунан киирэр дьикти алыптаах. Кэлин кэмҥэ ордук оҕо-ыччат тыыннаах муусуканы өйдүүр, сэҥээрэр, ону ааһан араас инструменнарга оонньуур буолбута олус кэрэхсэбиллээх уонна хайҕаллаах.
Ыам ыйын 29 күнүгэр Майаҕа Д.Ф.Ходулов аатынан норуот айымньытын дьиэтигэр «Гитара тула» диэн ааттаммыт тыыннах дорҕоон дьоро киэһэтигэр Майа сэлиэнньэтигэр оҕолор, ыччаттар ортолоругар баар рок бөлөхтөрүн, биирдиилээн толорооччуларын кэнсиэрэ буолан ааста.
Бу сонун тэрээһини М.К.Попова аатынан Майатааҕы оҕо ускуустубатын оскуолатын испиэлиис-преподавателэ, СӨ култууратын туйгуна, СӨ култууратын үтүөлээх үлэһитэ Дмитрий Санников көҕүлээн тэрийдэ. Кини ‒ оскуолаҕа үөрэнэр кэмиттэн вокальнай-инструментальнай ансаамбылга оонньоон кэлбит тыыннаах муусуканы өрө туппут айар куттаах киһи, элбэх ырыа ааптара.
Кэнсиэркэ Дмитрий Семенович кэккэ сылларга ускуустуба оскуолатыгар эбии дьарык быһыытынан ыллыан, инструмеҥҥа оонньуон баҕалаах оҕолору түмэн тэрийбит бөлөхтөрө, гитара доҕуһуолунан ыллыыр-туойар биирдиилээн толорооччулар ‒ «Алтан», «Тыал», «Ыйдаҥа» бөлөхтөрө, бэйэтэ айбыт ырыаларынан Эдира Саввина уонна Зоя Чупрова салайааччылаах классическай гитара кылааһын үөрэнээччилэрэ кытыннылар. Оҕолор, ыччаттар биирдиилээн инструменнарга бэркэ оонньуулларын таһынан бөлөҕүнэн толоруулара ситэн-хотон улахан сценаҕа тахсыылара тус бэйэлэригэр да, көрөөччүлэргэ да умнуллубат өйдөбүлү хаалларда. Ордук «Тыал» бөлөхтөн соло гитараҕа оонньообут Данил Федоров киһи хараҕар быраҕыллар. Уолчаан кыратын көрүмэҥ, инструмены бэркэ баһылаабыт мусукаан быһыытынан көһүннэ. Оҕолорбут бары маастарыстыбаларын үрдэтиигэ салгыы дьарыктанан инникитин да ааттара ааттанарыгар баҕарабыт.
Сүрэҕи долгутар гитара тыаһынан доҕуһуолламмыт тыыннаах муусука дьоро киэһэтин бэйэлэрин ырыаларынан ыҥырыылаах ыалдьыттар Хорообуттан ырыаһыт, мелодист Федор Сергучев, Аллараа Бэстээхтэн кырачаан толорооччу Дьулус Сысолятин, «Үрдэл-2025» өрөспүүбүлүкэтээҕи национальнай музыкальнай бириэмийэ номинаннара Төхтүртэн Полина Аргунова, Семен Цой киэргэттилэр.
Дмитрий Санников курдук энтузиаст-уһуйааччылар тыыннаах муусуканы кэнчээри ыччаттарбытыгар уһуйааччылар элбээн истиннэр диэн баҕа санаалаахпыт.
Алена Докторова.
.