Биир дойдулаахпыт, Мэлдьэхси нэһилиэгин олохтооҕо тимир ууһа Радион Шарин бу сайын Москва куоракка ыытыллыбыт «Ыстаалы тургутуу» күрэскэ кыттан кыайыылааҕынан тахсыбыта.
Кини онно өбүгэ үгэһигэр олоҕуран бэйэтэ оҥорбут саха омук төрүт туттар тэрилэ – батыйа уйанын-хатанын көрдөрөр сыалтан кыттыбыта. Батыйа былыр-былыргыттан быһах, сүгэ, анньыы оннугар, о.э. киэҥник, элбэх сыалга туттар тэрилбит буолар.
«Ыстаалы тургутуу» – бу Medium Quality продакшн-хампаанньа саҥа шоута буолар. Манна биилээх сэп-сэбиргэл араас көрүҥүн оҥорор, ону тэҥэ кэллиэксийэлиир дьон кытталлар. Үс түһүмэхтээх күрэскэ кинилэр бастыҥ биилээхтэрин хаачыстыбатын итиэннэ бэйэлэрин тэриллэрин төһө бэркэ баһылаабыттарын тургутан көрдөрөллөр. Шоу ыытааччытынан Арассыыйаҕа биллэр элбэх көрүҥнээх киирсии байыаһа Магомед Исмаилов буолар.
– Бу күрэс сайын, ыһыахтар кэннилэриттэн буолбута, – диэн биһиэхэ Радион Шарин кэпсээтэ. – Саас эрдэ сүүмэрдээһин оҥорон, ыҥырыы ыыппыттарыгар сөбүлэспитим. Шоу барыта түөрт сезоннаах буолар. Бастакы сиэрийэтигэр Саха сириттэн биллэр тимир ууһа, Хаҥаластан төрүттээх Александр Данилов кыттыбыта уонна кыайыылааҕынан тахсыбыта. Мин иккис сезоҥҥа киирэн эмиэ бастаатым.
Радион бэйэтэ Мэлдьэхси төрүт олохтооҕо, 2018 сылтан уһанар, анал кыһа дьиэлээх. Билигин бу уһанар дьиэтин сайыннаран, олохтоох дьаһалта көмөтүн итиэннэ улуустан грант өйөбүлүн туһанан, 2 этээстээх улахан кыһа тутта сылдьар.
Радион бу сонун, саҥа күрэхтэһиигэ барарыгар саха омук төрүт тэрилинэн – батыйанан кыттыаххын наада диэн итиэннэ батыйатын угун оҕус кутуругун, таба иҥиирин туһанан оҥороругар Мэҥэ Хаҥалас уустара, бииргэ төрөөбүт уус убайа Виктор Шарин сүбэлээбиттэрин, күүс-көмө буолбуттарын махтана бэлиэтиир.
Уус батыйатын бэйэтин кыһатыгар охсубут. Онуоха бу үлэтигэр дьиэ кэргэнэ – ойоҕо уонна уола тутуһан-хабыһан, сүбэлэрин холбоон, кырата суох көмөлөөхтөр.
Ол түмүгэр батыйа хайдахтаах курдук уустук тургутууну ситиһиилээхтик ааспытын видеоҕа көрүөххэ сөп.
Февронья ОХЛОПКОВА.
