Бүгүн, атырдьах ыйын 15 күнүгэр, Бастакы Майатааҕы полумарафоҥҥа анаан анал дизайынынан оҥоһуллубут мэтээллэри уонна футболкалары аҕаллылар.
Полумарафоҥҥа суруйтарбыт 300 кыттааччыга, волонтердарга, тэрийээччилэргэ аналлаах мэтээл Санкт-Петербург куоракка, спортивнай футболкалар «Айрон» хампаанньа нөҥүө Кыргызстааҥҥа сакааска оҥоһуллан кэлбиттэр.
«Быйыл Майа сэлиэнньэтигэр Чөл олох сылын чэрчитинэн элбэх тэрээһин ыытылынна. Бу өрөбүлгэ, атырдьах ыйын 18 күнүгэр, Бастакы Майатааҕы полумарафон буолуоҕа, – диэн «Майа сэлиэнньэтэ» тыа сирин түөлбэтин баһылыга Алексей Неустроев иһитинэрдэ. – Тэрээһини Аан дойду хайа баҕарар муннугуттан көрөргө 11 камера быһа эпииргэ көдөрүөҕэ. Бу күн биһиги элбэх ааттаах-суоллаах спортсменнары, сүүрүүнү көҕүлээччилэри, саҥа саҕалааччылары күүтэбит.
Полумарафон 4 араас дистанциятын бастакы үс кыайыылаахтара уу харчынан наҕараадаланыахтара. Дьоҥҥо-сэргэҕэ успуорт бырааһынньыгын бэлэхтиэхпит диэн эрэнэбит».
Алексей Иннокентьевич тэҥҥэ үлэлэһэр, чөл олоҕу тарҕатар биир дойдулаахтарыгар, партнердарга, урбаанньыттарга күүс-көмө буолалларын иһин ис сүрэҕиттэн махтанарын туһунан эттэ.
Иван Лукин.
