Нөөрүктээйи нэһилиэгэр Улуу Кыайыы 80 сылын көрсө олохтоох түмэл иһинэн сонун тэрээһин буолан ааста.
Бу күн түмэл үлэһиттэрэ уонна “Эдэр кыраайы үөрэтээччилэр” куруһуок иитиллээччилэрэ автобуһунан нэһилиэк түөлбэлэрин уонна тэрилтэлэрин устун мусуой тэрийдилэр. Павловскай орто оскуолатын үөрэнээччилэрэ Алексеенко Дархан (6 кыл.), Григорьев Айыллан (5 кыл.), Попов Миша (6 кыл.) уонна Скрыбыкина Милена (7 кыл.) нэһилиэк олохтоохторугар бырайыактарын кэпсээтилэр. Оҕолор Аҕа дойду сэриитин кэминээҕи саллаат кааскатын , буорах сыттаах суруктары, хаартысканы, “Кыым” хаһыат ыстатыйаларын чинчийбиттэрин билиһиннэрдилэр. Ону таһынан көлөлөөх мусуойга нэһилиэкпититтэн сэриигэ баран хорсуннук сэриилэспит дьоммут наҕараадаларын туһунан Дархан кэпсээтэ,Кытайтан сакаастаан ылбыт уордьаннар, мэтээллэр макеттарын оҕолор да, улахан да дьон интэриэһиргээн көрдүлэр.
Нөөрүктээйи нэһилиэгиттэн сэриигэ кыттан Кыайыы кынаттанан дойдуларыгар эргиллибит дьоммут наҕараадаларын, туттубут малларын чымадаан иһигэр уган ыччаттара быыстапкаҕа туруордулар.
Биир күн устата нэһилиэкпит түөлбэлэрин, детсады, оскуоланы хабан сэргэх тэрээһин буолла.
Кылгас кэм устата элбэх дьон хабылынна. Аҕам саастаах бэтэрээннэрбит автобус иһигэр тэриллибит мусуойу көрөн долгуйдулар, астыннылар. Кыайыы күнүгэр сэргэх, дьоһун бэлэх буолла диэн махтаннылар.
Игнатьев И.П- Кинигэ Уйбаан аатынан түмэл
