Ил Дархан Анал этиитэ
СӨ Ыччат парламенын чилиэнэ, «Майа сэлиэнньэтэ» тыа сирин түөлбэтин Дьиэ кэргэн киинин салайааччыта, СӨ 2024 с. «Сыл бастыҥ волонтера» Владлена Павлова СӨ Ил Дарханын Айсен Николаев СӨ Судаарыстыбаннай мунньаҕар (Ил Түмэҥҥэ) Туһаайыытынан санаатын үллэстэр:
‒ СӨ Ил Дархана Саха сиригэр Ийэ дойдуну көмүскээччи сылын биллэрбитин истэммин үөрдүм, долгуйдум! Үүнэр сылга Аҕа дойду Улуу сэриитигэр Кыайыы 80 сылын бэлиэтиирбитинэн бу ордук тоҕоостоох.
Билиҥҥи уустук кэм ааһан, эйэлээх халлаан анныгар олохпут туругурарын туһугар, дойдубут дьоно бүттүүн туруулаһабыт. Ийэ дойдубутун көмүскүү байыаннай дьайыыга кытта сылдьар уолаттарбыт төрөөбүт дойдуларыгар этэҥҥэ түргэнник төннөллөрүн бары эрэнэ олус күүтэбит. Норуот күүһэ ‒ түмсүүгэ, сомоҕолоһууга!
Биһиги, ыччаттар, аҕа саастаах көлүөнэҕэ ытыктабыллаахтык сыһыаннаһар, өйөбүл буолар, көмөлөһөр ‒ сүрүн эбээһинэспит, иэспит. Ийэ дойдубутун таптыырга, киниэхэ бэриниилээх буолууга сир ахсын патриотическай хамсааһыннары сайыннаран үүнэр көлүөнэни иитиигэ-үөрэтиигэ болҕомто күүһүрэр. Онуоха хас биирдиибит холобур буоларга дьулуһабыт.
