Остуолларыгар эт, үрүҥ ас мэлдьи баар

Майа сэлиэнньэтин олохтоохторо Мария уонна Иван Сергучевтар дьиэ кэргэн кэтэх хаһаайыстыбанан 2002 сылтан саҕалаан дьарыктаммыттара.

Бастаан олбуордарыгар турар хотонноругар 4 сибинньэни иитэн, кыстыгы этэҥҥэ тураппыттара. Ол кэннэ ынах ииттэр баҕа санааланан, 4 туора муостаахтан саҕалаабыттара.

Сыыйа хаһаайыстыбаларын кэҥэтэн, 2022 сыллаахха аныгы сэндвич панель матырыйаалынан саҥа хотон туттан үлэҕэ киллэрбиттэрэ. Эргэ хотоннорун толору көтүрбэккэ үрдүн хаалларбыттара сайын ньирэйдэргэ күн итиититтэн уонна ардахтан саһар, күһүн уонна кыһын идэһэ астыыр миэстэ буолар.

Быйыл кыһыны 17 туора муостааҕы этэҥҥэ туоратан, 6 ынахтара төрөөн, сайын устата ыаллар остуолларыгар куруук күөрчэх, арыы, сүөгэй, суорат баар. Эбии саас сибинньэ ылан иитэн, күһүн идэһэ оҥостоллор.

Дьиэ кэргэн бэйэтэ бас билэр оттуур сирэ суоҕа, сэлээркэ уонна тиэхиньикэ сапаас чааһын сыаната сылтан сыл үрдүү турара кэтэх хаһаайыстыбалаах ыалга сүрүн кыһалҕа буолар. Дьону кытта кэпсэтэн, дуогабардаһан, сайын устата сүөһүлэрин кыстатар отторун булаллар.

Оҕолор Ольга, Элла уонна Иван кыра эрдэхтэриттэн үлэҕэ сыстаҕастар, төрөппүттэригэр күүс-көмө, саамай эрэнэр дьонноро буолаллар. Окко дьиэ кэргэн күргүөмүнэн киирэннэр, арыт илиилэринэн уонна дьоҕус тиэхиньикэлэрин көмөтүнэн араас туруктаах алаастары оттоон, үлэни кыайа туталлар.

«Бэйэ хаһаайыстыбалаах буолан үрүҥ ас, эт атыыласпакка олоробут. Ордугун атыылаан эбии дохуот оҥостобут. Оҕолор атахтарыгар туралларыгар хаһаайыстыбабыт улахан көмөлөөх буолан, салгыы сайыннарар былааннаахпыт!» – диэн Иван Николаевич, Мария Николаевна Сергучевтар төрүт дьарыгы өрө туталларын бигэргэтэллэр.

 

Иван Лукин.