Билиилээх киһиэхэ суол мэлдьи аһаҕас. “Үөрэх – билии төрдө”, “Үөрэх – хараҥаҕа тыкпыт сырдык”, “Билии – баай төрдө”, онтон да атын өс хоһоонноро өбүгэттэн мээнэ кэлбэтэхтэрэ. От ыйын 15 күнүгэр Ф.Г.Охлопков аатынан Майа орто оскуолатын аактабай саалатыгар улууспут оскуолаларын кыһыл уонна үрүҥ көмүс мэтээллэринэн бүтэрбит оҕолору чиэстиир “Махталлаах санаанан…” тэрээһин буолла.
Манна быйыл оскуоланы бүтэрбит оҕолор төрөппүттэриниин, үөрэппит учууталларыныын уонна улуус, Майа сэлиэнньэтин дьаһалтатын, үөрэх салалтатын үлэһиттэрэ сааланы толору муһуннулар. Тэрээһин үөрүүлээх чааһа дойдубут, өрөспүүбүлүкэбит, улууспут өрөгөй ырыаларынан саҕаланна.
Быйыл улууспут оскуолаларын 402 оҕо бүтэрбит. Кинилэртэн орто үөрэх кыһатын 15 оҕо кыһыл көмүс, 23 оҕо үрүҥ көмүс мэтээллэринэн бүтэрдилэр. Үөрүүлээх күҥҥэ мэтээлинэн бүтэрбиттэргэ салайааччылар алгыстаах эҕэрдэлэрин анаатылар.
“Мэҥэ Хаҥалас улууһа” муниципальнай оройуон баһылыгын эбээһинэһин толорооччу Василий Филиппов 11 сыл тухары билиилэрин-көрүүлэрин иҥэрэн барыга дьоҕурдаах туйгун үөрэнээччилэри иитэн-такайан таһаарбыт кыһамньылаах төрөппүттэри, учууталлары сыаналыырын эттэ. Бу үс өрүт бииргэ сыралаах үлэлэрин түмүгэ буоларын бэлиэтээтэ. Салгыы бу ситиһиилэринэн тохтоон хаалбакка, талан ылбыт үрдүк үөрэхтэригэр үөрэнэн улуустарыгар, өрөспүүбүлүкэлэригэр ааттарын ааттатар үтүө дьон тахсалларыгар баҕа санаатын тиэртэ.
Василий Валерьевич кыһыл көмүс мэтээли кытта улуус баһылыгын 10000 солкуобайдаах истипиэндьийэлэрин Н.Д.Неустроев аатынан Бэдьимэ орто оскуолатын бүтэрэр Роман Соловьевка, В.П.Ларионов аатынан Майа орто оскуолатын бүтэрэр Анастасия Максимоваҕа, Саргылаана Новгородоваҕа, И.Г.Тимофеев аатынан Майатааҕы лиссиэйи бүтэрэр Сайыына Дьячковскаяҕа, Марк Захаровка, Сайаана Ивановаҕа, Вячеслав Назаровка, Лилия Неустроеваҕа, Алена Охлопковаҕа, Диана Платоноваҕа, Анастасия Сидороваҕа, Арина Сидороваҕа, М.Е.Попов аатынан Аллараа Бэстээх орто оскуолатыттан Анастасия Румянцеваҕа, И.М.Романов аатынан Төхтүр орто оскуолатыттан Любовь Степановаҕа, С.Н.Михайлов аатынан Чыамайыкы орто оскуолатыттан Азиза Копыринаҕа туттарда. Оҕолор төрөппүттэригэр Эҕэрдэ суруктар туттарылыннылар.
В.В.Филиппов үрүҥ көмүс мэтээли кытта улуус баһылыгын 5000 солкуобайдаах истипиэндьийэлэрин М.П.Габышев аатынан Балыктаах орто оскуолатын бүтэрбит Сайдам Винокуровка, В.П.Ларионов аатынан Майа орто оскуолатын бүтэрбит Динара Павловаҕа, Антонина Барашковаҕа, Анжелика Басоваҕа, И.Г.Тимофеев аатынан Майа лиссиэйин бүтэрбит Нарыйаана Андросоваҕа, Владимир Артемьевка, Юлия Дьяконоваҕа, Диана Платоноваҕа, Айсен Устиновка, Алена Федороваҕа, Мира Романоваҕа, Анастасия Соловьеваҕа, Сандаара Шестаковаҕа, Уйгун Эверстовка, Ф.Г.Охлопков аатынан Майа орто оскуолатын бүтэрбит Анна Потаповаҕа, Михаил Дмитриевка, Аллараа Бэстээх 2-с нүөмэрдээх орто оскуолатын бүтэрбит Айыына Харитоноваҕа, В.Н.Оконешников аатынан Павловскай орто оскуолатын бүтэрбит Лилиана Старостинаҕа, Р.А.Бурнашов аатынан Табаҕа орто оскуолатын бүтэрбит Полина Егороваҕа, Альберт Марковка, А.А.Пахомов аатынан Тиэлиги орто оскуолатын бүтэрбит Алина Игнатьеваҕа, И.М.Романов аатынан Төхтүр орто оскуолатын бүтэрбит Иванна Неустроеваҕа, С.З.Борисов аатынан Тыыллыма орто оскуолатын бүтэрбит Василиса Кириллинаҕа туттарда. Оҕолор төрөппүттэригэр Эҕэрдэ суруктар туттарылыннылар.
Өркөн өйдөөхтөрү улуустааҕы үөрэх управлениетын начаалынньыгын солбуйааччы Ирина Плотникова эҕэрдэлээтэ: “2024-2025 үөрэх дьылыгар улуус үрдүнэн 6014 оҕо үөрэммититтэн 402 оҕо оскуоланы бүтэрдэ. Кинилэр истэриттэн 38 бастыҥ оҕолор бүгүн чиэстэннилэр. Бу көрдөрүү биһиэхэ олус үөрүүлээх. Ааспыт сылга 35 оҕо мэтээлинэн бүтэрбитэ. Эбии үөрэхтээһин киирэн сыллата көрдөрүү тупсарыгар биһиги хас биирдии төрөппүккэ, учууталга махтанабыт. Бу уһуйаантан саҕалаан саҥарарга, сүүрэргэ-көтөргө, алын сүһүөх оскуолаҕа ааҕарга, суруйарга үөрэтэн, орто сүһүөххэ сөптөөх биридимиэттэри талан бастыҥ буоларга турууласпыт кылааспыт салайааччыларын, оскуолабыт кэлэктиибин үлэлэрин, төрөппүт оҕоҕо кыһамньытын, учууталга сыһыанын түмүгэ буолар. Оҕолорбут 11 сыл үөрэнэллэрин устата бэйэлэригэр сыал-сорук туруорунан араас таһымнаах олимпиадаларга, куонкурустарга, ааҕыыларга кыттан улууспут аатын дорҕоонноохтук ааттатан кэллилэр. Билигин устудьуон олоҕор киирэҥҥит сөбүлээн талбыт идэҕитигэр үөрэнэҥҥит, уопсастыбаннай үлэҕэ кыттыһаҥҥыт, улуускут аатын ааттатар үлэһит буолуоххут диэн эһиэхэ эрэнэбит. Эһиги көмөҕүтүнэн быйылгы БКЭ туттарыытыгар профильнай математикаҕа биллэр тупсуу буолла, ону тэҥэ, химияҕа, биологияҕа, нуучча литэрэтиирэтигэр орто баалбыт тубуста. Үөрэх-билии кыһатыгар 11 сыл устата үөрэнэн, иҥэриммит билиигитин тургутан, үрдүк ситиһиилээхтик бүтэрбит оҕолор ааккыт Мэҥэ Хаҥалас үөрэҕириитин устуоруйатыгар көмүс буукубанан суруллан киирдилэр”.
Инньэ диэн туран, Ирина Михайловна биир кэлим эксээмэн түмүгүнэн биирдиилээн биридимиэккэ муҥутуур үрдүк бааллаах оҕолорго улуустааҕы үөрэҕирии салалтатын грамоталарын туттарда. И.Г.Тимофеев аатынан Майа лиссиэйин үөрэнээччитэ Сайыына Иванова математиканы 86, географияны 81, Сайыына Дьячковская химияны 82, Слава Назаров математиканы 86, информатиканы 93, Алена Охлопкова математиканы 86, Диана Платонова историяны 89, Мира Романова физиканы 74, Арина Сидорова нуучча тылын 91, обществознаниены 73, Анастасия Соловьева обществознаниены 73, М.Е.Попов аатынан Аллараа Бэстээх орто оскуолатыттан Анастасия Румянцева английскай тылы 90, Н.Д.Неустроев аатынан Бэдьимэ орто оскуолатыттан Роман Соловьев нуучча тылын 91, Дмитрий Таас аатынан Хорообут орто оскуолатыттан Лия Элляева нуучча тылын 89 баалга туттараннар чиэстэннилэр.
Төрөппүттэр ааттарыттан Юлия Дьячковская, туйгун үөрэнээччилэр ааттарыттан И.Г.Тимофеев аатынан лиссиэйи бүтэрбит Алена Охлопкова махтал истиҥ тылларын учууталларга анаатылар.
Үөрүүлээх күн кыттыылаахтарын Төхтүр орто оскуолатын үөрэнээччитэ Надя Сметанина “Ийэҕэ махтал” ырыанан, Майатааҕы лиссиэй үөрэнээччитэ Сахаайа Макарова скрипкаҕа оонньоон эҕэрдэлээтилэр. Дьоро күнү В.П.Ларионов аатынан Майа орто оскуолатын омук тылын учуутала Мария Филиппова үрдүк таһымҥа ыытта.
Үтүөнү үксэтэр өркөн өйдөөх, сайдыыны саргылыыр сайдам санаалаах кэскиллээх ыччаппытын олох киэҥ аартыгар бигэтик үктэммиккитинэн истиҥник эҕэрдэлиибит!
Марелла Баишева.
