Тыа хаһаайыстыбатын үлэһиттэрин күнүн көрсө Хорообут орто оскуолатын 15 үлэһитэ «Хорообут» ХЭТ ыанньык хотонугар тахсан үлэлээтилэр.
Биир да күнү өрөөбөккө үлэлиир ыанньыксыттары солбуйан кыратык да буоллар күннээҕи түбүктэриттэн сынньаттыбыт. Хаһаайыстыбаҕа 4 ыанньыксыт 120 ынаҕы күннэтэ көрөллөр, аһаталлар, ыыллар. Элбэх буолан көмөлөөн үлэни үмүрү туттубут, бэйэбит да астынныбыт. Нэһилиэкпит тэрилтэлэрин үлэһиттэрэ былааннаахтык кэлэн солбуйаллар. Эр дьоммут субаннары көрдүлэр, аһаттылар. Саҥа сырдык, сылаас хотоҥҥо үлэлиир усулуобуйа толору тэриллибит. Урукку курдук уулатарга хорууданы соспоккун, поилканан уу кэлэ турар. Оскуолабыт дириэктэрэ Владислав Иванов үлэбит түмүгэр ыарахан үлэлээх дьоммутун өссө солбуйуохпут диэн санаатын эттэ.
Улууспут салалтата Аллараа Бэстээххэ бу күн тыа хаһаайыстыбатын үлэһиттэригэр бэртээхэй күнү бэлэхтээтэ. Баран кэлбит үлэһиттэр үөрүүлэрин үллэстэллэр. Саахымакка, дуобакка, хаамыскаҕа, хабылыкка, сыалы ытыыга күрэхтэстилэр. Харах бырааһыгар, терапевка, хирурга, эндокринологка, кардиологка көрдөрдүлэр, УЗИ түстүлэр, бассыайыҥҥа сырыттылар.
Октябрина ВАСИЛЬЕВА.
