В.П.Ларионов аатынан Майа орто оскуолатын кэлэктиибин бары үлэһиттэрэ үс күн устата бары күүһү субуотунньукка анаатылар. Хаптаҕай уонна Ороссолуода базатыгар баар «Юность», «Дружба» оҕо сайыҥҥы сынньалаҥын лааҕырыгар кырааскалаатылар, олбуор күрүөтүн саҥартылар. Икки күн дьаныардаах үлэ түмүгүнэн сайыҥҥы лааҕыр дьиэтэ-уота сэргэхсийдэ, оҕолору мантан сайын үөрэ-көтө көрсөргө бэлэм буолла.
Биир улахан үлэҕэ оскуолабыт тэпилииссэтигэр буору сиидэлээтибит, оҕуруот арассаадаларын, оскуола тулатыгар сибэккини олортубут. Мантан сайын иҥэмтэлээх оҕуруоппут аһа өлгөмнүк үүннүн, дьэрэкээн сибэккилэрбит хараҕы сымнаттыннар.
Бүгүн Ураһалаах сиригэр-уотугар бөҕү ыраастыыр субуотунньук тэрилиннэ. Түмсүүлээх буоллахха хайа даҕаны үлэ барыта ситэр-хотор.
Светлана Ефимова
