Олунньу 11 күнүгэр А.А.Пахомов аатынан Тиэлиги орто оскуолатыгар үөрүүлээх быһыыга-майгыга мэссэнээппит, бэпэчиитэл Александр Алексеевич Пахомовка аналлаах дэкээдэ түмүктэниитин тэрээһинэ ыытылынна.
Тэрээһин үөрүүлээх чааһыгар дэкээдэ устата араас таһымнаах олимпиадаларга, ааҕыыларга, күөн күрэстэргэ ситиһиилээхтик кыттыбыт үөрэнээччилэр грамотанан, дипломунан наҕараадаланнылар. Ону тэҥэ дэкээдэ устата элбэх «туйгун» сыананы ылан «Бастыҥ үөрэнээччи күннүгэ» кыайыылаахтарынан алын кылаас үөрэнээччилэриттэн 4 кылаас үөрэнээччитэ Еремей Алексеев, орто сүһүөх үөрэнээччилэриттэн 8 кылаас үөрэнээччитэ Амелия Захарова, үрдүкү сүһүөх үөрэнээччилэриттэн 10 кылаас үөрэнээччитэ Ангелина Иванова ааттаныллар.
Тэрээһин чэрчитинэн Александр Алексеевич СӨ Үөрэҕин миниистирэ Ньургууна Соколова үөрэх-иитии кыһаларын иннилэригэр туруорбут соругар олоҕуран, оскуолабытыгар идэҕэ туһаайыы үлэтин күүһүрдэр сыалтан Р.И. Брызгалов аатынан Аллараа Бэстээҕи Тырааныспар тиэхиникумун дириэктэрин Иннокентий Оконешниковы П.И.Дудкин аатынан Дьокуускайдааҕы Сибээс уонна информационнай технология колледжын дириэктэрин Гаврил Семеновы кытары үөрэнээччилэри көрсүһүүнү тэрийдэ. Иннокентий Афанасьевич, Гаврил Иннокентьевич үөрэнээччилэргэ үөрэх суолтатын, тиэхиникумҥа, колледжка туттарсыыга ирдэбиллэри билиһиннэрдилэр, ыйытыыларга хоруйдаатылар. Бу үөрэх кыһаларыгар үөрэнээччилэри билсиһэ, көрө-истэ, инникитин туттарса кэлэллэригэр ыҥырдылар. Ону таһынан бу үөрэх тэрилтэлэрин кытары бииргэ ситимнээхтик үлэлэһэргэ дуогабар түһэрсиллэн илии баттанна, үлэ былаана торумнанна.
А.А.Пахомов аатынан Тиэлиги орто оскуолатын «Хомпу» медиакиинэ.
