Олохтоох бэйэни салайыныы күнүгэр аналлаах «Толкуйдаа. Таай. Тобул» оонньуу 20 хамаанданы түмтэ

Муус устар 21 күнүгэр Аллараа Бэстээх бөһүөлэгэр дойду Бэрэсидьиэнэ Владимир Путин ыйааҕынан 2013 сылтан бэлиэтэнэр Олохтоох бэйэни салайыныы күнүгэр «Толкуйдаа. Таай. Тобул» оонньуу ыытылынна.

Билиини-көрүүнү тургутар тэрээһин «IT-куб» цифровой үөрэхтээһин киинигэр буолан ааста. Барыта 20 хамаанда, 100 кыттааччы кэлэн бэйэтин билиитин тургутан көрдө.

Үөрүүлээх быһыыга-майгыга 13 нэһилиэк олохтоох бэйэни салайыныы үлэһиттэрин уонна 7 улуус дьаһалтатын хамаандаларын улуус дьокутааттарын сэбиэтин бэрэссэдээтэлэ Иннокентий Андросов, улуус баһылыгын бастакы солбуйааччы Гаврил Толстяков эҕэрдэлээтилэр уонна өрөспүүбүлүкэ, улуус таһымнаах анал наҕараадалары туттардылар. Интеллектуальнай оонньууну И.М.Сосин аатынан оройуоннааҕы киин бибилэтиэкэ кылаабынай бибилэтиэкэрэ Екатерина Дмитриева уонна М.И.Брызгалова аатынан Майатааҕы оҕо бибилэтиэкэтин сүрүннүүр бибилэтиэкэрэ Лилия Федорова ыыттылар. Дьүүллүүр сүбэҕэ улуустааҕы кииннэммит бибилэтиэкэ ситимин кылаабынай библиограба Надежда Сидорова, ону тэҥэ дириэктэр Марианна Никанорова, методист Марина Трифонова үлэлээтиилэр.

Оонньуу «Тургутук», «Кини кимий?», «Айымньыны таай», «Киинэ ырыатын таай», «Тобул» түһүмэхтэртэн турар. Бииртэн биир интэриэһинэй, өйү-санааны уһугуннарар түһүмэхтэргэ хамаандалар илин-кэлин түһүстүлэр. Уопсай түмүккэ үһүс миэстэни «Алаас» Майа сэлиэнньэтин хамаандата, иккис миэстэни «Уол Табаҕа» Тараҕай нэһилиэгин хамаандата ыллылар уонна Ороссолуода нэһилиэгин «Силиги» хамаандата кыайыылааҕынан таҕыста. Кыайыылаах хамаандалар мэтээллэринэн уонна харчынан наҕараадаланнылар.

Маны тэҥэ тус бэйэни тургутан көрүү түһүмэҕэ ыытылынна. Кыттааччылар куйаар куодунан киирэн боппуруостарга эппиэттээн сүүмэрдиир түһүмэҕи ааһан, түмүктүүр түһүмэххэ икки кыттааччы күөн көрүстэ. Муҥутуур кыайыылааҕынан Аллараа Бэстээх дьаһалтатын сүрүннүүр исписэлииһэ Владислав Старостин таҕыста.

Бүгүҥҥү оонньууттан хамаандалар билиилэрин туругутан, билбэттэри билэн, күннээҕи сыралаах үлэлэриттэн сэргэхсийэн тарҕастылар.

 

Иван Лукин.