Төҥүлү нэһилиэгин «Алаһа» бэтэрээннэрин сэбиэтин көхтөөх кыттыылаахтара Сэбиэскэй Сойуус Дьоруойа Ф.К.Попов төрөөбүт дойдутугар, үтүө-мааны дьоннордоох, баай устуоруйалаах Баатара нэһилиэгэр ыалдьыттаан кэллибит.
Евдокия Михайловна Никифорова салайааччылаах Сыымах бэтэрээннэрин кытта көрсөн, сэһэргэһэн, уопут атастаһан, элбэҕи билэн-көрөн кэллибит. Сахаттан бастакы Дьоруойбут Федор Кузьмич Попов түмэлигэр, кадет кылаастаах оскуолаҕа кыһыҥҥы тэпилииссэ лабораториятын көрөн олус астынныбыт.
Ол кэннэ итии астаах сандалы тула олорон кэпсэтэн, маассабай оонньуулары оонньоон, икки өттүттэн эҕэрдэлэһэн, уопсай флешмобтаан, оһуокайдаан, көрсүһүү сэргэхтик саҕаланна. Анна Егоровна Баишева хабылыкка, хаамыскаҕа маастар кылаас көрдөрөн, сыымахтар быыстапка туруоран кыттааччылар интэриэстэрин тартылар.
Онон бу күммүт олохпутугар биир умнуллубат, хатыламмат күн буолла. Төҥүлүттэн алта буолан сырыттыбыт, Бүтэйдээхтэн үс бэтэрээн, Майаттан хомуньуустар Анатолий Еремеевич Чичахов, Анатолий Константинович Захаров кыттыыны ыллылар.
Улуу Кыайыы 80 сылыгар анаммыт үлэбит былаанын биир тэрээһинэ сэргэхтик, үрдүк тэрээһиннээхтик ааспытыттан сүргэбит көтөҕүлүннэ, ылыммыт былааммыт туолла. Сыымахтарга бэрт истиҥник уонна тэрээһиннээхтик көрсүбүттэригэр барҕа махтал буоллун. Өссө да бу курдук бары түмсүүлээхтик үлэлиэҕиҥ-хамсыаҕыҥ.
Галина Громова,
«Алаһа» бэтэрээннэр сэбиэттэрин салайааччыта.
Төҥүлү бөһүөлэгэ.
