Оҕолорго «Чөл олох» уруһуй куонкуруһа түмүктэннэ

Аан дойдутааҕы Доруобуйа күнүн чэрчитинэн Мэҥэ Хаҥаласка улуустааҕы киин балыыһа оҕолорго анаан кулун турар 15 – муус устар 15 күннэригэр «Чөл олох» уруһуй куонкуруһун тэрийэн ыытта.

Бу күрэхтэһиигэ улуус эдэр худуоһунньуктара бэйэлэрин айар үлэлэрин нөҥүө успуорт, сөптөөх аһылык, гигиена, көхтөөх сынньалаҥ уонна куһаҕан дьаллыктар буортуларын туһунан кэпсээтилэр.

Муус устар 30 күнүгэр үөрүүлээх быһыыга-майгыга Майа сэлиэнньэтин оҕо поликлиникатын киэргэтэр 50-тан тахса кыттааччы үлэтин көрдөрөр быыстапкаҕа уруһуйдар ааптардарын уонна кинилэр төрөппүттэрин улуустааҕы киин балыыһа кылаабынай бырааһа Иннокентий Павлов, улуустааҕы киин балыыһа биэлсэрэ, биир идэлээхтэр сойуустарын бэрэссэдээтэлэ Иван Пивоваров эҕэрдэлээтилэр.

Куонкурус түмүгүнэн 7-10 саастаах оҕолорго 3-с миэстэни Сандаара Уваровская (Мэҥэ Хаҥаластааҕы КЦСЗН), 2-с миэстэни Аэлина Степанова («Кэрэли» оҕону эбии үөрэхтээһин киинэ) ыллылар. Бастакы миэстэҕэ Дуня Винокурова («Кэрэли») таҕыста.

11-14 саастаах оҕолорго 3-с миэстэ Лиана Аринкина («Кэрэли»), 2-с миэстэ Күннэй Тарабукина (М.К.Попова аатынан Майатааҕы оҕо уксуустубатын оскуолата) буоллулар. Бастакы миэстэни Виктория Арбатская (М.К.Попова аатынан Майатааҕы оҕо уксуустубатын оскуолатын Аллараа Бэстээхтээҕи филиала) ылла.

15-17 саастаах оҕолорго Лена Бурцена (Е.Д.Кычкин аатынан Матта орто оскуолата) бастакы миэстэ буолла.

Маны тэҥэ «Саамай кыра кыттааччы» анал ааты 6 саастаах «Чуораанчык» оҕо уһуйаанын иитиллээччитэ Айыллаана Афанасьева ылла.

Иван Пивоваров:

– Оҕолорбут үчүгэйи, куһаҕаны кыра саастарыттан араара үөрэнэ сылдьалларыттан сүрдээҕин диэн үөрэбит. Бэйэлэрин санааларынан, өйдөрүнэн оҥорбут үлэлэрэ биһигини олус   кэрэхсэтэр уонна инникитин оҕолор доруобай буолалларыгар үтүө өйдөбүлү хаалларар.

Куруутун даҕаны бу маннык тэрээһиннэри тэрийиэхпит. Өссө да көхтөөх кыттааччылар элбии туралларыгар баҕа санаалаахпыт.

Оҕолорбут кыра саастарыттан «Чөл олох» диэн хайдаҕын биллиннэр, көрдүннэр, – диэн санаатын үллэһиннэ.

 

Иван Лукин.