«Мэҥэ Хаҥалас улууһа» муниципальнай оройуон дьаһалтата, дьокутааттарын Сэбиэтэ, Ытык Сүбэтэ тумус туттар, ытык киһибит, Социалистическай Үлэ Дьоруойа, ССРС Үрдүкү Сэбиэтин түөрт төгүллээх дьокутаата, «Ленин», «Үлэ Кыһыл Знамята», «Өктөөп өрөбөлүүссүйэтэ» уордьаннар кавалердара, Арассыыйа үтүөлээх агронома, РСФСР норуотун үөрэҕириитин туйгуна, Саха Өрөспүүбүлүкэтин, Чурапчы уонна Мэҥэ Хаҥалас улуустарын бочуоттаах олохтооҕо
Новгородова Екатерина Иннокентьевна
бу дьыл олунньу 25 күнүгэр 95 сааһыгар сылдьан уһун, ыарахан ыарыыттан күн сириттэн күрэммитинэн дьиэ кэргэнигэр, оҕолоругар, сиэннэригэр, чугас аймах-билэ дьонугар дириҥ кутурҕаммытын тиэрдэбит.
Ытыктыыр киһибит Екатерина Иннокентьевна 1929 сыл муус устар 13 күнүгэр Чурапчы улууһун Кытаанах сэлиэнньэтигэр төрөөбүтэ. Оҕо сааһа олус ыарахан сут-кураан, өлүү-сүтүү сэрии ыар кэмнэригэр түбэһэн, улахан дьону кытта тэҥҥэ Улуу Кыайыыны уһансарга холкуоска буһа-хата үлэлээбитэ.
1948 сыллаахтан Кытаанах сэлиэнньэтин сүбэтин сэкирэтээринэн, оройуон сэбиэтин устурууктарынан таһаарыылаахтык үлэлээбитин таба көрөннөр үөрэттэрэ ыыталлар. 1955 сыллаахха агроном идэтин баһылаан, дойдутугар Чурапчыга холкуос биригэдьииринэн, 1957 сыллаахха кэргэн тахсан Мэҥэ Хаҥаласка көһөн кэлэн агрономунан үлэлээн, Үлэ Дьоруойуттан Гавриил Самсоновтан оҕуруотчут идэтигэр уһаарыллан, 1961 сыллаахтан Хаптаҕайга Ленин аатынан сопхуос оҕуруот аһын үүннэрэр биригээдэ биригэдьииринэн ананар. Олоҕун тухары үлэни өрө тутан, ыарахантан чаҕыйбакка, тыйыс килиимэттээх Сахабыт сиригэр оҕуруот аһын хотуулаахтык үүннэрэн үрдүк көрдөрүүнү ылбыта.
ССРС Үрдүкү Сэбиэтин Президиумун 1973 сыл ахсынньы 11 күнүнээҕи ыйааҕынан Екатерина Новгородоваҕа Социалистическай Үлэ Дьоруойун үрдүк аата иҥэриллибитэ.
Киэн тутта ааттыыр ытык киһибит Екатерина Иннокентьевна сырдык мөссүөнэ, үтүө майгыта өйбүтүгэр, сүрэхпитигэр өрүү тыыннаах. Кини олоҕун, үлэтин-хамнаһын хоһуун холобуругар оҕолорбутун, ыччаттарбытын иитэр, үтүө аатын үйэтитэр, үлэтин-хамнаһын салҕыыр ытык иэстээхпит.
Д.И. Тихонов, «Мэҥэ Хаҥалас улууһа» муниципальнай оройуон баһылыга
И.И. Андросов, «Мэҥэ Хаҥалас улууһа» муниципальнай оройуон дьокутааттарын Сэбиэтин бэрэссэдээтэлэ
З.И. Игнатьев, Мэҥэ Хаҥалас улууһун «Ытык сүбэтин» бэрэссэдээтэлэ