Сайыҥҥы сынньалаҥ үтүө күннэрин В.П.Ларионов аатынан Майа ортот оскуолатын үөрэнээччилэрэ кыайыы кынаттаах көрсөллөр.
Владивосток куоракка 2-с төгүлүн ыытыллыбыт Норуоттар икки ардыларынааҕы «Приморские Ассамблеи искусств» ырыа, үҥкүү күрэһин бэстибээлигэр биһиги оскуолабыт үөрэнээччилэрэ бэрт ситиһиилээхтик кытыннылар. Ол курдук, «Тускул» үҥкүү ансаамбыла 2 «а» кылаас үөрэнээччилэрэ «Туллуктар» үҥкүүнэн үһүс истиэпэннээх лауреат аатын ылары ситистилэр. Уус-уран салайааччы: Артемьева Л.И, кыл. салайааччыта: Расторгуева М.Э.
«Кустукчаан» ансаамбыл 4 «б» кылаас үөрэнээччилэрэ «Сайын кэллэ» нүөмэринэн бэстибээл муҥутуур кыайыылаахтара буолан бастакы истиэпэннээх лауреат буоллулар. Уус-уран салайааччылар: Скрябина Р.А., Ефремова У.М., Кривошапкина В.Ф. Кылаас салайааччылара: Бурнашева Т.А., Кононова А.С.
Ити курдук үөрэнээччилэрбит төрөөбүт норуоттарын фольклорун, үҥкүүтүн-ырыатын өрө тутан, киэҥ аартыктары дабайаллар, үрдүк ситиһиилэри аҕалаллар. Оҕолорбутугар, кинилэр салайааччыларыгар уонна төрөппүттэригэр итии-истиҥ эҕэрдэ буоллун!
Хаалбыт күннэргэ оҕолорбут Владивосток куорат кэрэ сирдэринэн, зоопарканан, аквапаарканан астыктык күүлэйдээн, саҥаны-сонуну билэн-көрөн, дуоһуйа сынньанан кэллиннэр! Оҕолору кылаас салайааччылара уонна төрөппүт Ирина Васильевна Никанорова иилээн-салайан илдьэ сылдьаллар.
Светлана Ефимова
