Олунньу 25 күнүгэр В.К.Степанов аатынан 68-с култуура уонна успуорт эстэпиэтэтин былааҕа Бүтэйдээххэ айаннаан тиийдэ. Нөөрүктээйи нэһилиэгин бастыҥ спортсменнара, талааннаах дьоно-сэргэтэ “Түмсүөҕүҥ, сомоҕолоһуоҕуҥ- эйэлээх олоҕу тутуоҕуҥ” диэн санаанан салайтаран, Бүтэйдээххэ ыалдьыттаатылар.
Күнүс 12 чаастан Бүтэйдээхтэр түөлбэ төлкөлөөх түһүлгэтин төрүттээтилэр. Оҕотуттан саҕалаан ураты кэрэ матыыптаах, эриэккэс үҥкүүлээх Мэҥэлии оһуокайы олохтоон, биир санаанан салайтаран устар ууну сомоҕолуур уран тыллаах эҕэрдэлээх эһиэкэйи астына иһиттибит. Данил Соловьев, Светлана Ильинична Попова, Ньургуйаана Семеновна Прокопьева иэйэн-куойан үҥкүү тылын таһаардылар. Көрүү түмүгүнэн Бүтэйдээх оһуокайа 4.02 баалынан сыаналанна.
Бүтэйдээх нэһилиэгин уран уустарын, маастардарын уус-уран оҥоһуктарын быыстапката 400-чэкэ үлэни түмтэ. Эстафета балаһыанньатыгар олоҕуран ыйыллыбыт темаҕа көрүҥнэринэн үлэлэспиттэрэ кэрэхсэннэ. «Сиэдэрэй» түмсүү, Сидорова Саргылана Алексеевна, Борисова Елизавета Дмитриевна, Петрова Евдокия Прокопьевна аттаран, кыбытан тигии үлэлэрэ, паннолара, Сергеева Елена Дмитриевна, Чямпина Валентина Николаевна кылтан, сиэлтэн үлэлэрэ, Титова Светлана Дмитриевна туойтан оҥоһуктара, «Чэчир» сыахай түмсүүтүн, Аргунова Клавдия Федоровна куукула оҥоһуктара, Аргунов Иннокентий Иннокентьевич алтантан, тимиртэн уус-уран оҥоһуктара, Марков Иннокентий Васильевич, Иванов Хрисанф Семенович саха төрүт иһитигэр улахан чороонноро, Колесов Василий Васильевич тимиртэн скульптурнай композицията, Аргунов Николай Семенович муостан уус-уран оҥоһуктара үрдүктүк сыаналаннылар. Быыстапка уопсай түмүккэ 4,17 баалынан сыаналанна.
Успуорт доҕордуу көрсүһүүтүн түһүлгэтэ үгэс курдук элбэх көрөөччүнү, ыалдьааччыны түмтэ. Эрийсиилээх киирсии түмүгэр,ыалдьыттар ордук бэлэмнээхтэрин көрдөрөн, кыайыы өрөгөйүн, олохтоохтор хотторуу хомолтотун биллилэр. Ахсаан 24,5 – 10,5 Нөөрүктээйи туһатыгар буолла.
Киэһэ 19 чаастан саҕаламмыт Нөөрүктээйилэр кэнсиэрдэригэр олохтоохтор кулуубу толору муһуннулар. Ирдэбилгэ киирбит 18 нүөмэри сэргии-сэҥээрэ көрдүлэр. Хор толоруутугар “Мэҥэ өрөгөйүн ырыата”, “Тыыннаахтар умнубат сыллара” ырыалар, “Санаайа” дьахталлар ансаамбылларын толоруутугар “Оһуохай”ырыа, “Дайар” үҥкүү бөлөҕүн “Төрүт оонньуулар” үҥкүүлэрэ, “Ийэ дойду туһугар” уус-уран ааҕыы, Диана Еремеева, Михаил Осоров толорууларыгар ырыалар, Светлана Иванова, Диана Еремеева дуэттара, бальнай үҥкүү бөлөҕүн толоруутугар “Синий платочек” үҥкүү кэнсиэр дипломааннарынан буоллулар. Оригинальнай жанр нүөмэрэ, чабырҕахсыттар бөлөхтөрө, “Төрүт” фольклор бөлөҕө, “ Дайар” үҥкүү бөлөҕүн “Дьиэрэҥкэй” үҥкүүтэ, “Кэрэли” квартет ырыата уонна ыччат түмүктүүр нүөмэрэ биһирэнэн, лаурет үрдүк аатын сүктүлэр. Кэнсиэргэ барыта 82 киһи кытынна. Нөөрүктээйи кэнсиэрэ 4,08 баалынан сыаналанна.
68-с култуура уонна успуорт эстэпиэтэтин алгыстаах айана салҕанар. Нэһилиэктэрбитигэр ситиһиини баҕарабыт. Ким түмсүүлээх, үчүгэй бэлэмнээх — ол кыайдын!
