Денис Жирков салайааччылаах ынах сүөһүнү иитиинэн дьарыктар «Томтор» ХЭТ-кэ улуус дьаһалтатын үбүлээһининэн 100 миэстэлээх хотон тутуутун үлэтэ саҕаланна.
Тыа хаһаайыстыбатын тэрилтэтэ 1996 сыллаахха тэриллибитэ, 14 үлэһиттээх. 164 сүөһүлээх, ол иһигэр 80 ыанар ынахтаах. Сайыҥҥы үлэ түмүгүнэн, 480 туонна оту оттоотулар, дуогабарынан 80 туонна үүтү туттарыахтаахтарын куоһаран 90 туоннаны туттардыдар. Быйыл сүүмэрдээһини ааһан, Павел Трофимов салайааччылаах «Агроэксперт» тыа хаһаайыстыбатынан дьарыктанар тэрилтэлэри арыаллыыр хампаанньаны кытта үлэни саҕалаатылар. Тэтимнээхтик үлэлиир тэрилтэ саҥа сүүрээнинэн, ыһыы быргырааматыгар кыттан сеялка атыылаһан, бурдук ыһыытын саҕалаата.
Инникитин күрүө саҥардыытын бырагырааматыгар кыттар былааннаахтар. Күтэрдээх сайылыгар аныгылыы титииги тутан үлэҕэ киллэрдилэр. Минсельхоз бырагырааматынан от пириэстиир, охсор, мунньар тиэхиньикэлэри ылбыттар.
Изабелла Романова.