Национальнай бырайыак: «Уһун көхтөөх үйэлэнии»
Эрдэ билиһиннэрбиппит курдук, тохсунньу 26‒30 күннэригэр улууспут биэс нэһилиэгэр ‒ Бүтэйдээххэ, Табаҕа, Моорукка, Хочоҕо уонна Хорообукка Дьокуускайтан Мэдиссиинэ кыһалҕаларын чинчийэр Саха сиринээҕи научнай киин исписэлиистэрин эспэдииссийэтин көһө сылдьар бөлөҕө үлэлээбитэ.
Эспэдииссийэ бөлөҕө өрөспүүбүлүкэбит улуустарынан сылдьан төрүөхтэриттэн уонна удьуорунан бэриллэр ньиэрбэ, сүһүөх, мэйии ыарыыларын нэһилиэнньэ ортотугар эмтиир-сэрэтэр, чинчийэр үлэни ыытар.
‒ Мэҥэ Хаҥаласка эспэдииссэйэнэн биһиги иккис сырыыбыт буолла. Ааспыт сылга Төҥүлү эҥэр нэһилиэктэринэн сылдьыбыппыт. Бу сырыыбытыгар бөлөх састаабыгар киирэр ревматолог, невролог, генетик, лаборант быраастар биэс нэһилиэккэ уопсайа 232, ол иһигэр дьиэҕэ тиийэн 1 консультация оҥордубут. 183 киһи мэдиссиинэ социальнай анкетированиетын аастылар, 113 киһи салгыы молекулярнай-генетическэй чинчийиини ааһалларыгар биологическай матырыйаалларын, 70 киһи биохимическэй чинчийиигэ хааннарын туттардылар. 20 киһи научнай киин килииникэтин стационарыгар эмтэнэнэ киирэллэригэр ыҥырдыбыт, ‒ диэн улууспутугар үлэлэрин туһунан эспэдииссийэ салайааччыта, генетик-быраас Оксана Сидорова билиһиннэрдэ.
Итини таһынан научнай киин көһө сылдьар бөлөҕө нэһилиэнньэҕэ ыарыылары сэрэтиигэ уонна Табаҕа, Наахара орто оскуолаларын үрдүкү кылаастарын үөрэнээччилэригэр научнай-үөрэтэр уонна идэҕэ туһаайыыга ис хоһоонноох лиэксийэлэри аахтылар. Кинилэр улуус кылаабынай бырааһыгар Иннокентий Павловка, сылдьыбыт нэһилиэктэрин биэлсэр-акушер пууннарын уонна учаастактааҕы балыыһалар бары үлэһиттэригэр эспэдииссийэ үлэтигэр күүс-көмө буолбуттарыгар махтаналлар.
Алена ДОКТОРОВА.
