Арассыйаҕа уонна Саха Өрөспүүбүлүкэтигэр Оскуола иннинээҕи үөрэхтээһин сылыгар, ону тэҥэ Мэҥэ Хаҥалас улууһугар оскуола иннинээҕи үөрэхтээһин 100 сылыгар Аллараа Бэстээхтээҕи оскуолаҕа киириэн иннинээҕи оҕону сайыннарар билии-көрүү хайысхалаах «Сказка» оҕо уһуйаанын иитээччитэ Татьяна Николаевна Петрова–Кулаковская үрдүк идэлээх таһымын иһин Саха Өрөспүүбүлүкэтин Ил Дарханын А.С.Николаев аатынан «Бастыҥ педагог-настаабынньык» бириэмийэтин ылла.
Ил Дархан бириэмийэтэ бары улуустартан уонна куорат уокуруктарыттан 36 бастыҥ педагог-настаабынньыкка туттарыллыбыта. Өрөспүүбүлүкэ баһылыга Айсен Николаев бэлиэтээбитинэн, бу – норуот бириэмийэтэ, тоҕо диэтэххэ кыайыылаахтары олохтоохтор бэйэлэрэ талаллар, оттон сыанабылга ааптар методиката уонна педагогтар идэҕэ сайдыыларыгар усулуобуйаны тэрийии учуоттанар.
Татьяна Николаевна 31 сыл устата оҕону иитиигэ бэриниилээхтик үлэлиир. Бу сыыппара кэннигэр — тыһыынчанан оҕо мичээрэ, сүүстэн тахса аһаҕас дьарык уонна, билиҥҥи кэмҥэ саамай суолталааҕа, кэлэр кэскилгэ сирдиир эдэр үлэһиттэри идэҕэ уһуйуу суола баар. Кини уопуттаах иитээччи уонна настаабынньык быһыытынан эдэр педагогтары кытта өр сылларга таһаарыылаахтык үлэлиир. Саҥа кэлбит киһи кэлэктиипкэ киирэригэр бэйэтин суолун булуута, үлэҕэ сылайыыттан көмүскэллээх буолуута уонна идэтийбит таһымыгар сөптөөх сайдыыны ылыыта ирдэнэр. Настаабынньык киниэхэ хонтуруолдьут буолбакка, теорияны олоххо киллэрэргэ көмөлөһөр, үлэ үөрүйэхтэригэр уһуйар тирэх буолар.
Татьяна Николаевна наставничествота методическай кэбиньиэт иһинэн эрэ хааччахтаммат. Кини оҕолорго эрэ буолбакка, кинилэр дьиэ кэргэннэригэр эмиэ үтүө сүбэһит, өйөбүл буолар. Үлэтигэр үөрэх хаачыстыбатыгар ирдэбилэ киһилии сылаас сыһыаны кытта дьүөрэлэһэр. Ол иһин кинини оҕолор таптыыллар, төрөппүттэр ытыктыыллар уонна кэллиэгэлэрэ үрдүктүк сыаналыыллар. Кини уопсастыбаннай уонна айар дьоҕура киэҥ далааһыннаах. Татьяна Николаевна — идэлээх сойуус бастакы сүһүөх тэрилтэтин, аттестационнай хамыыһыйа уонна педагогическай сүбэ актыыбынай чилиэнэ. «Сыккыс» театральнай кэлэктиип артыыһа, В.К. Степанов аатынан култуура уонна успуорт эстэпэтэтин, ону таһынан өрөспүүбүлүкэтээҕи уонна Уһук Илиҥҥи театральнай куоҥкурустар элбэх төгүллээх дипломаннара уонна лауреаттара буолар.
Татьяна Николаевна Петрова-Кулаковская — настаабынньык буолуу педагог мииссийэтин сүрүн түмүгэ буоларын дьиҥнээхтик дакаастаабыт киһи. Иитиллээччилэри, төрөппүттэри уонна педагогтары өйөөһүн тирэхтээх үүнүүнү биэрэр, оттон киһилии сылаас сыһыан, үрдүк ирдэбил уонна айар көрдөөһүн оҕо уһуйаанын эрэ буолбакка, бүттүүн олохтоох нэһилиэнньэ сомоҕолоһуутун күүһүрдэр – мииссийэ толоруллар.
