Өрөспүүбүлүкэбитигэр Култуура сылыгар “Нөөрүктээйиттэн төрүттээх айар талааннаах дьоммут ” диэн ааттаах бырайыакпыт чэрчитинэн уран тарбахтаах дьоммутун, норуот маастардарбытын сырдатар анал быыстапкалары тэрийэбит.
Алтынньы 17 күнүгэр олохтоох түмэлгэ Нөөрүктээйиттэн төрүттээх, Павловскай орто оскуолатын бүтэрбит, Төхтүр олохтооҕо Артемьева Александра Владимировна “Удьуор утума салҕанар.. “ айар быыстапката арылынна.
Александра Владимировна нэһилиэккэ ытыктанар, айылҕаттан талааннаах Александра Дмитриевна уонна Владимир Титович Ивановтар кыра кыыстара. Ийэтэ айылҕаттан дьоҕурдаах иистэнньэҥ, аҕата “Играй , гармонь” ансаамбыл бастакы салайааччыта. Төрөппүттэрэ иккиэн уус-уран самодеятельность актыыбынай кыттааччылара этилэр.
Төрөппүттэрин дьоҕурдара оҕолоругар бэриллэн Александра Владимировна норуот маастарыгар тиийэ үүннэ. Кини Мэҥэ Хаҥалас, өрөспүүбүлүкэ норуот маастара, Мэҥэ Хаҥалас оройуонун Дархан ууһа, СӨ култууратын туйгуна, Төхтүрдээҕи ”Хатат“ куруһуок салайааччыта, улуустааҕы “Мэҥэ сыахай” түмсүү чилиэнэ, сыана бэтэрэээн, Дьаҥхаады нэһилиэгин Бочуоттаах олохтооҕо.
“Удьуор утума салҕанар …“ диэн ааттаах Александра Владимировна айар үлэлэрин быыстапката арыллар үөрүүлээх күнүгэр чугас дьоно, бииргэ үөрэммит дьүөгэлэрэ, учууталлара, олохтоох дьаһалта, «Айылгы» норуот айымньытын киинин исписэлиистэрэ, В.Н. Оконешников аатынан Павловскай орто оскуолатыттан, уопсастыбаннай түмсүүлэр кыттыыны ыллылар, эҕэрдэлэрин тиэртилэр. Мустубут дьоҥҥо Александра Владимировна илиитин сылааһынан айан таһаарбыт үлэлэрин билиһиннэрдэ.Кини саха төрүт ииһин илдьэ сылдьар, ону эдэр ыччакка тиэрдэр сыаллаах айа- тута сылдьар норуот маастара буолар. Мустубут дьон Александра Владимировна тикпит соннорун, үтүлүктэрин уонна сыахайдары интэриэһиргээн көрдүлэр.
Бу күн оҕолорго быысабай сииктэрин үөрэтэр маастар кылааһы ыытта.
Александра Владимировнаҕа инникитин да өссө айымньылаах үлэни, үрдүк дабайыылары баҕарабыт. Маннык өрүү дьону кэрэҕэ, сырдыкка угуйа сырыт. Удьуор утума кэнчээри ыччаттаргытыгар бэриллэн, кэҥээн, сайдан истин!
Юлия Колосова, Наталья Максимова, И.П. Игнатьев аатынан түмэл.
