Алтынньы 25 күнүгэр Моорук нэһилиэгин оскуолата тэриллибитэ 105 сылыгар анаммыт үөрүүлээх бэлиэ тэрээһиннэр буолан аастылар. Үбүлүөй чэрчитинэн Моорукка Бэрэ алааһыгар маҥнайгы норуодунай оскуола тэриллибит сиригэр-уотугар өйдөбүнньүк бэлиэ стела суругун сөргүттүлэр. Төрүттээччи гильдиялаах атыыһыт Алексей Васильевич Егоров аата ахтыллан, тыыл уонна үөрэх, култуура бэтэрээннэрэ кытыылаах ахтыы оҥорон, видеоҕа уһуллан үйэтитилиннилэр.
Алтынньы 27 күнүгэр Моорук нэһилиэгин орто үөрэхтээһин оскуола тэриллибитэ 105 сылыгар анаммыт үөрүүлээх тэрээһин буолан ааста.
Бу күн ыраахтан-чугастан, араас сылларга Моорук оскуолатыгар үөрэммит, уонна олох киэҥ аартыгар кынат анньынан үрдүккэ дабайбыт, араас көлүөнэ сыллардааҕы үөрэнээччилэрэ, үлэлээн ааспыт дьоно-сэргэтэ ыалдьыттаатылар.
Бэлиэ күн сиэринэн алгыстаах алаадьылаах арчылыы көрүстүлэр. Бу тэрээһин сүрүн сиэрин туомун нэһилиэк, улуус Ытык кырдьаҕаһа, бэтэрээн учууталбыт Апросимов Аполлон Михайлович аал уоту оттон, алгыс сытын таһааран үтүө тылларын анаата, арчылаата. Норуот маастара, СӨ үөрэҕириитин туйгуна Егорова Туйара Дмитриевна тойук туойан алгыс сиэрин силигин ситэрэн биэрдэ.
Оскуолаҕа кэлбит ыалдьыттарга анаан эҕэрдэ бастыҥ тылларын оскуола дириэктэрэ Людмила Андреевна Апросимова тыл этэн арыйда. Уонна көлүөнэлэр көрсүһүүлэрин үөрүүлээх түгэнэ, араас тиэмэнэн кылаас чаастара, маастар кылаастар ыытылалларын сырдатта.
Урукку кэмҥэ оһоҕунан оттуллар оскуола, билигин тупсаҕай көстүүлэнэн, оҕо сааспыт дьоллоох биһигэ буолбут оскуолабыт, ааспыт уонна билиҥҥи аныгы кэм тэтиминэн сирдэтэн, оскуола олоҕун сырдатар ураты оҥоһуктарыгар өйдөбүнньүк хаартыскаҕа түһүүтэ, амтаннаах сандалы мааны остуол тула олорон, итии үүттээх чээй иһэн ирэ- хоро кэпсэтэн, ааспыты санаһан, билиҥҥини сураһан, кэлэр кэскили түстэһэн бэртээхэй түгэн буолла.
Онтон күн иккис аҥарыгар үөрүүлээх чааһы Т.К.Апросимова аатынан нэһилиэк култуура киинигэр оскуола үөрэнээччилэрин уонна учууталларын кыттыылаах эҕэрдэ кэнсиэринэн ситэрилиннэ.
Ыраахтан-чугастан оскуолаларын эҕэрдэлии сорук оҥостон кэлбит мааны ыалдьыттарбыт, оскуоланы бүтэрбит үөрэнээччилэрбит анаан аҕалбыт бэлэхтэрин, алгыс тылларынан Махтанан, үөрэппит учууталларыгар, тапталлаах оскуолаларыгар туттардылар.
Улуус баһылыга, биир дойдулаахпыт, Моорук оскуолатын биир бастыҥ, холобур оҥостор үөрэнээччитэ Дмитрий Иванович Тихонов, улуус үөрэҕириитин начальнигын солбуйааччы Александра Родомировна эҕэрдэ тыллаах, дьоһун бэлэхтээх күндү ыалдьыт буоллулар.
Улуус баһылыгын уонна үөрэҕирии эйгэтин, олохтоох дьаһалта баһылыгын үрдүкү бэлиэлэринэн күн бүгүн үлэлии сылдьар, үлэҕэ үрдүк кылааттаах, ситиһиилээх учууталлары, техүлэһиттэри, бэтэрээн учууталлары чиэстээтилэр, эҕэрдэ бэлэх туттардылар.
Үбүлүөйдээх тэрээһин умнуллубат бэлиэ түгэнинэн, СӨ үтүөлээх тириэньэрэ, СӨ үөрэҕириитин туйгуна, СӨ успуордун уонна физическай култууратын туйгуна, Моорук нэһилиэгин Бочуоттаах гражданина Николай Иванович Бояров олорон ааспыт чаҕылхай олоҕун, үлэтин, ситиһиилэрин, бииргэ алтыһан ааспыт доҕотторун, үөрэнээччилэрин ытыктабылын ылыан ылбыт уонна кинини киһи, аҕа, учуутал, тириэньэр, доҕор, табаарыс быһыытынан сырдатар күндү учууталбытыгар анаммыт «Ким үлэлиир ‒ ол дьоллоох!» саҥа кинигэ сүрэхтэниитэ буолла.
Бу тэрээһин СӨ физкултуура хамсааһынын 100 сыла, Дойдуга Педагог уонна настаабынньык уонна үлэлээбит, сыратын сылбатын таптыыр идэтигэр анаабыт оскуолатын 105 сылын бэлиэтиир ураты түгэҥҥэ тэриллибитэ олус үөрдэр.
Кинигэ сүрэхтэниитин үөрэнээччитэ Матрена Сыромятникова иилээн-саҕалаан ыытта.
Үбүлүөйдээх тэрээһиҥҥэ сылдьыбыт дьон сүргэлэрэ көтөҕүллэн, урукку ааспыт кэм ахтылҕаныгар куустарар үҥкүү дьоро киэһэтинэн тэрээһини түмүктээтилэр.
Александра Уваровская
