Дойдубар, үтүө үлэһит дьонноох Моорук нэһилиэгэр кэлэ сылдьан, сайын үтүөтэ хайдах ааһан эрэрин билээри, ыччат дьону кытта үлэлээн тиритэ сылдьар баһылыгы солбуйааччы Радомир Прокопьевич Никитини көрсөн, бу туох үлэһит оҕолорой диэн ыйыталастым.
«Бу устудьуоннар тутар этэрээттэрин оҕолоро от ыйын 18 күнүттэн атырдьах ыйын 18 күнүгэр диэри, толору биир ый биһиги улууспутугар, 31 нэһилиэктэн биһиги эрэ нэһилиэккэ, Суола Моорукка, 10 буоланнар кэллилэр. Устудьуоннар сайынын нэһилиэктэргэ туох үлэ, кыһалҕалаах боппуруос баарынан үлэлииллэр: дьиэ-уот, күрүө-хаһаа тутуута, хаарбах эбийиэктэри көтүрүү, о.д.а. элбэх. Тутар этэрээт хамсааһына саҕаламмыта ыраатта, ыччаттар сайын аайы өрөспүүбүлүкэбит араас улуустарыгар үлэ-хамнас үөһүгэр сылдьаллар.
Биһиги, нэһилиэктэр, улууспут салалтатыгар устудьуоннар тутар этэрээттэрин саас эрдэттэн туруорсабыт. Устудьуоннарга хамнастарын улуус уонна ыччат министиэристибэтэ кыттыһан көрөллөр. Биһиэхэ сыллата халаан уута кэлэриттэн уу мунньустан, ходуһаларга туран хаалар түгэннэрдээх. Оҕолор ханаабалары хастылар, ууну аһардарга анаан турбалары уурдулар, даамбалары хордулар. Ону таһынан ыһыахтыыр сирбитигэр күрүөтун саҥардан биэрдилэр, эргэ тутуулары көтүрэн, саҥардыы үлэтин ыытарга көмөлөстүлэр. Социальнай эбийиэктэри күрүөлээһин үлэтэ ыытылынна, кырааскаланна. К.К.Байкалов аатынан түмэлгэ көмөлөстүлэр. Оҕолор Амма, Үөһээ Бүлүү, Мэҥэ Хаҥалас, о.д.а. араас улуустан сылдьаллар», – диэн иһитиннэрдэ.
Онон бу сайын Моорукпутугар үлэ күөстүү оргуйан, сэргэхсийии, өрө тардыныы барбыта кэрэхсэбиллээх. Тутар этэрээт оҕолоро нэһилиэкпит сайдыытыгар сэмэй кылааттарын киллэрсэн, олохтоох ыччаттары кытта доҕордоһуу биэчэринэн түмүктээн, төрөөбүт дойдуларыгар тарҕаһыахтара.
Устудьуоннар этэрээттэрин үлэһит ыччаттарыгар биир дойдулаахтар ааттарыттан махтанабыт.
Матрена Сыромятникова.
