Тапталлаах улууспут Мэҥэ Хаҥалас төрүттэммит бэлиэ күнүн көрсө, олунньу 10 күнүгэр, В.В.Местников аатынан култуура сайдыытын киинигэр Аллараа Бэстээх бөһүөлэгин бибилэтиэкэтигэр “Мин улууһум киэн туттар дьоно” сиэрийэнэн ГЕОРГИЙ МИХАЙЛОВИЧ АРТЕМЬЕВКА анаммыт бэйэтин суруйуулара, аймахтарын, чугас дьоннорун, үөлээннээхтэрин, бииргэ үлэлээбит дьонун ахтыылара киирбит саҥа кинигэ сүрэхтэниитэ буолла.
Георгий Михайлович Артемьев Саха АССР норуотун хаһаайыстыбатын үтүөлээх үлэһитэ, Саха АССР XII ыҥырыылаах Үрдүкү Сэбиэтин, I, III, IV ыҥырыылаах Ил Түмэн норуодунай дьокутаата, «Гражданскай килбиэн» бэлиэ хаһаайына, РФ Суруналыыстарын сойууһун чилиэнэ, Таатта, Мэҥэ Хаҥалас улуустарын бочуоттаах гражданина, 1966 сылтан Сэбиэскэй Сойуус Коммунистическай Партиятын – Российскай Федерация Коммунистическай Партиятын чилиэнэ этэ. Георгий Михайлович төрөөбүт дойдутугар, дьонугар-сэргэтигэр бэриниилээх, ытыктабыллаах сыһыаннаах, ырааҕы-киэҥи ыраҥалаан толкуйдуур, үтүө үлэһит, дуоспуруннаах, ылыннарыылаах тыллаах, көнө сүнньүлээх, чиэһинэй, эппит тылыгар турар, саҕалаабытын тиһэҕэр тиэрдэр салайааччы.
Саҥа кинигэ улуус баһылыга Дмитрий Тихонов дьаһалынан бэчээттэнэн таҕыста. Улуус дьокутааттарын сэбиэтин бэрэссэдээтэлэ Иннокентий Андросов салалтатынан анал хамыыһыйа үлэлээтэ. Кинигэ тахсыытын Мэҥэ Хаҥаластааҕы кииннэммит бибилэтиэкэ ситимин дириэктэрэ Марианна Никанорова салайда. Кинигэни түмэн сүрүн үлэтин И.М.Сосин аатынан улуустааҕы киин бибилэтиэкэ кылаабынай библиограба Надежда Сидорова оҥордо, ахтыылары Татьяна Артемьева, Людмила Дедюкина, Екатерина Баишева түмтүлэр, кинигэ кылаабынай эрэдээктэрэ – бибилэтиэкэ кылаабынай методиһа Мария Габышева. Библиографическай испииһэги бибилэтиэкэ библиограба Надежда Винокурова хомуйан оҥордо. Сыһыарыыга QR-код нөҥүө: Майа-ТВ пуондатыттан видео таһаарыылар киллэрилиннилэр.
Саҥа кинигэ сүрэхтэниитигэр Мэҥэ Хаҥалас улууһун дьокутааттарын сэбиэтин бэрэссэдээтэлэ Иннокентий Андросов, бөдөҥ политическай диэйэтэл, Саха АССР XII ыҥырыылаах Үрдүкү Сэбиэтин дьокутаата, I уонна II ыҥырыылаах Ил Түмэн дьокутаата, Ил Түмэн Бэрэстэбиитэллээх Палаататын бастакы Бэрэссэдээтэлэ, СӨ норуотун хаһаайыстыбатын үтүөлээх үлэһитэ Егор Ларионов, СӨ Ил Түмэн Судаарыстыбаннай Мунньаҕын дьокутаата, Сир сыһыаннаһыыларыгар, айылҕа ресурсаларыгар уонна экологияҕа сис кэмитиэт бэрэссэдээтэлэ Андрей Находкин, Георгий Михайлович кыыһа Людмила Дедюкина эҕэрдэ тылларын эттилэр, Георгий Михайлович туһунан итии-истиҥ тылларынан ахтан-санаан аастылар. Людмила Георгиевна аҕатын Георгий Михайлович Артемьев туһунан үйэлээх кинигэ тахсыбытынан күүс-тирэх буолбут дьоҥҥо махталын биллэрдэ.
Анастасия Варламова тылыгар уонна дьүрүлүгэр «Аҕам алааһа» ырыанан “Мэҥэбил” эр дьон вокальнай ансаамбыла (салайааччы СӨ култууратын туйгуна Георгий Попов) бэйэлэрин эҕэрдэлэрин тиэртилэр.
Салайааччы быһыытынан Георгий Михайлович кыаҕын-уоҕун, билиитин-көрүүтүн, киэҥи-кэскиллээҕи көрөрүн, далааһыннааҕын, талааннааҕын Сахабыт сирин дьоно-сэргэтэ үчүгэйдик билэрэ, дириҥник убаастыыра. Ол курдук Таатта улууһун баһылыгын социальнай боппуруостарга солбуйааччы Никифор Жерготов, ону тэҥэ Георгий Михайловичтыын бииргэ алтыспыт үөлээннээҕэ Тааттаттан Николай Колодезников үтүө тылынан ахтан-санаан аастылар.
СӨ норуотун хаһаайыстыбатын үтүөлээх үлэһитэ Георгий Михайлович Артемьев 1998-2003 сылларга Мэҥэ Хаҥалас улууһун баһылыгынан талыллан үлэлээбитэ. Эдэр эрдэҕиттэн салайар үлэҕэ үлэлээбит уопуттаах буолан, үйэлэр быыстарыгар, дойдуга ыарахан кэм сатыылаан турдаҕына кэлэн, төрөөбүт дойдутун сайдар суолга таһаарбыта. 2000 сыллаахха Мэҥэ Хаҥалас улууһа тэриллибитэ 70 сылыгар «Улуус 70 сылыгар — 70 тутуу” диэн бачыымы Георгий Михайлович Артемьев биллэрбитэ. Бачыым олоххо киирэригэр Георгий Михайлович салайыытынан үөрэх тэрилтэлэрин, социальнай обьектары саҥардыыга, тупсарыыга, өрөмүөн үлэлэрин ыытыыга күүстээх үлэ ыытыллыбыта.
Ол туһунан РФ Бочуоттаах тутааччыта, СӨ үтүөлээх тутааччыта, Мэҥэ Хаҥалас улууһун, Нөөрүктээйи нэһилиэгин Бочуоттаах олохтооҕо Петр Егоров, СӨ тыатын хаһаайыстыбатын үтүөлээх үлэһитэ, СӨ Бочуоттаах тутааччыта, Мэҥэ Хаҥалас улууһун, Төҥүлү, Доллу нэһилиэктэрин бочуоттаах олохтооҕо Федор Куличкин, РФ уонна СӨ Бочуоттаах тутааччыта, СӨ норуотун хаһаайыстыбатын үтүөлээх үлэһитэ, Мэҥэ Хаҥалас улууһун бочуоттаах олохтооҕо Гаврил Слободчиков сиһилии сырдаттылар.
Ааспыт 2025 сылга тохсунньу ый 28 күнүнээҕи уурааҕынан Аллараа Бэстээх 2 №-дээх орто оскуолатыгар Георгий Михайлович Артемьев аата иҥэриллибитэ. Оскуола күн бүгүн Үөрэх министиэристибэтэ оҥорор рейтининэн өрөспүүбүлүкэбит политехническэй хайысхалаах оскуолаларын ортолоругар биэс бастыҥ оскуола ахсааныгар сылдьар үрдүк көрдөрүүлэрдээх, инженернэй үөрэхтээһини инники күөҥҥэ тутар, саха тылынан саҥарар эйгэни, этнокультурнай хайысхаҕа күүскэ үлэлиир, патриотическай иитиини өрө тутар, оҕолор баҕалаах идэлэригэр бастакы олуктарын эрэллээхтик оҥорор оскуола буоларын, Георгий Михайлович сырдык аатын үйэтитиигэ инникитин былааннаах, таһаарыылаах үлэ барыахтааҕын Г.М.Артемьев аатынан Аллараа Бэстээх 2 №-дээх орто оскуолатын дириэктэрэ Ольга Колмакова бэлиэтээн эттэ. Анна Гоголева салайааччылаах «Бэстээх кэскилэ» ааҕааччылар бөлөхтөрө Лидия Андросова тылларыгар «Мэҥэм сирэ» уус-уран дьүһүйүүнэн кинигэ биһирэмэ түмүктэннэ.
Олоҕун барытын дьон-сэргэ олоҕо тупсарын, дойдута сайдарын туһугар, норуот интэриэһин туруулаһыыга анаабыт үрдүк таһымнаах, хорсун салайааччы Георгий Михайлович Артемьев үтүө аата умнуллуо суоҕа, бар дьонун сүрэҕэр мэлдьи тыыннаах буолуо! Георгий Михайлович Артемьев олорбут олоҕо, үлэтэ-хамнаһа, үтүө дьыалата эдэр ыччаты угуйа, үрдүк кэрдиискэ ыҥыра туруоҕа. Төрөөбүт дойдуга бэриниилээх буолуу, олох бу кэмҥэ хайдах этэй диэҥҥэ толору эппиэти биэрэр, иитэр-үөрэтэр суолталаах кинигэни ааҕааччы сыаналыаҕа диэн эрэнэбит.
И.М.Сосин аатынан улуустааҕы киин бибилэтиэкэ.
