Майа килбэйэр киинигэр турар киэн туттар “Мичил” оҕону сайыннарар кииммит муус устар 8 күнүгэр 90 сылын туолла. Бу кэрэ-бэлиэ даатаны көрсө элбэх тэрээһиннэр ыытыллан кэллилэр: “Дьиэ кэргэн уонна уһуйаан оҕону иитиигэ биир сомоҕо” сэминээр, Евдокия Забровская аатынан “Сүрэхпин оҕоҕо аныыбын” улуустааҕы хоһоон куонкуруһа, “Мин таптыыбын Майабын” уруһуй куонкуруһа, о.д.а. Түгэнинэн туһанан оҕону сайыннарар киин устуоруйатын кылгастык сэгэтэн көрүөҕүҥ.
1935 с. Сталин аатынан холкуоска, Хара нэһилиэгэр 25 миэстэлээх оҕо саада аһыллар. Нөҥүө сылыгар бу дьиэни Майаҕа көһөрөн аҕалан туталлар. Бу дьиэттэн улуус киинигэр бастакы нүөмэрдээх оҕо саадын устуоруйата саҕаланар. 1935-1949 сс. сэбиэдиссэйинэн иитээччи идэлээх Анна Егоровна Зыкова ананан үлэлиир. Оччолорго анал үөрэхтээх эдэркээн салайааччы бастакынан арыйбыт уһуйааныгар уһуннук уонна бэриниилээхтик үлэлээн үүнэр көлүөнэ ыччаты иитиигэ улахан кылаатын киллэрбитин сыаналаан, 2023 с. балаҕан ыйын 14 күнүгэр “Мичил” оҕону сайыннарар кииҥҥэ кини аатын иҥэрэллэр.
А.Е.Зыкова кэнниттэн салгыы 1949-1954 сс. Варвара Даниловна Егорова сэбиэдиссэйинэн үлэлиир.
Олох сайдан, оҕо ахсаана элбэээн оҕо саада 50 миэстэлээх буолар. 1954-1958 сс. сэбиэдиссэйинэн Мария Васильевна Прокопьева, Варвара Даниловна Егорова, иитээччилэринэн Матрена Афанасьевна Попова (Сидорова), Екатерина Федоровна Федорова үлэлэрин саҕалыыллар.
Оҕо саада билиҥҥи үөрэх управлениетын тэлгэһэтигэр баар буола сылдьыбыт дьиэҕэ этэ. Сэбиэдиссэйинэн 1958-1960 сс. Ирина Егоровна Васильева, иитээччинэн саҥа үөрэҕи бүтэрэн кэлбит эдэр исписэлиис Раиса Егоровна Охлопкова этилэр. 1960-1963 сс. Ольга Давыдовна Китаева, 1963-1964 сс. Татьяна Ивановна Васильева, 1964-1965 сс. Мария Петровна Лукина, 1965-1975 сс. Марина Ефимовна Апросимова, 1975 с. Матрена Петровна Попова, 1976 с. Жема Петровна Расторгуева, 1977 с. Лилия Георгиевна Шахурдина, 1978-1982 сс. Тамара Прокопьевна Аргунова, 1982-2010 сс. Альбина Алексеевна Стручкова, 2010-2022 сс. Людмила Иннокентьевна Дьяконова оҕо сайдыытыгар бары кыһамньыларын ууран таһаарыылаахтык үлэлээбиттэрэ.
Майатааҕы “Мичил” оҕону сайыннарар кииҥҥэ 2023 с. сэбиэдиссэйинэн Виктория Егоровна Бурнашева ананан кэлэн айымньылаахтык үлэлии сылдьар.
Муус устар 8 күнүгэр Д.Ф.Ходулов аатынан култуура киинигэр “Мичил” оҕону сайыннарар киин 90 сылын үрдүк таһымнаахтык бэлиэтээтэ. Бу күн ыҥырыылаах ыалдьыттарынан А.Е.Зыкова оҕолоро, Мэҥэ Хаҥалас улууһун Бочуоттаах олохтооҕо, өр сылларга улууска салайар үлэҕэ үлэлээбит Михаил Васильев, СӨ үөрэҕириитин туйгуна, СӨ үөрэҕириитин ситимин Бочуоттаах бэтэрээнэ, Васильевтар учууталлар династияларын баһылыга Дмитрий Васильев, Ил Түмэн Бочуоттаах бэтэрээнэ, Арассыыйа Суруналыыстарын сойууһун чилиэнэ Людмила Апросимова, СӨ тыатын хаһаайыстыбатын үтүөлээх үлэһитэ Василий Попов, сиэнэ Александра Исакова буоллулар. Ону сэргэ, улуус уһуйааннарын сэбиэдиссэйдэрэ, үлэлээн ааспыт бэтэрээннэр, ил иһигэр Альбина Стручкова, Инна Николаева, бэпэчиитэл Максим Забровскай, уһуйаан иитиллээччилэриттэн Ким Нестеров, улуус боропсойууһун президиумун чилиэнэ Мария Дмитриева ыалдьыттаатылар.
Бу күн Мэҥэ Хаҥалас улууһун баһылыгын социальнай уонна имиджевай бэлиитикэҕэ солбуйааччыта Татьяна Егорова эҕэрдэлээн туран үүнэр көлүөнэни иитиигэ-үөрэтиигэ уһун сыллаах эҥкилэ суох үлэлэрин, кэнчээри ыччат иитиитигэр кылааттарын иһин Мэҥэ Хаҥалас улууһун дьаһалтатын Грамотатынан уонна “За заслуги перед районом” бэлиэнэн Матрена Сыдыкбековаҕа, улуустааҕы физическай култуура уонна успуорт салалтатын Бочуоттаах грамотатын Наталья Лонгиноваҕа, улуустааҕы социальнай бэлиитикэ салалтатын махтал суругун Наталья Владимироваҕа, култуура уонна духуобунай сайдыы салалтатын Махтал суругун Тамара Платоноваҕа үөрүүлээхтик туттарда.
Үбүлүөйдээх күҥҥэ мустубут дьону Майа сэлиэнньэтин баһылыга Алексей Неустроев эҕэрдэлээтэ. Кини өр сыллаах бэриниилээх, үтүө суобастаах үлэтин, эбээһинэһигэр эппиэтинэстээх сыһыанын иһин олохтоох дьаһалта Бочуотунай грамотатынан уонна хары чаһытынан Федора Саввинаны, үүнэр көлүөнэ сайдыытыгар уонна иитиитигэр үтүө суобастаах үлэлэрин иһин Махтал суругунан Татьяна Петрованы, Ким Яковлевы наҕараадалаата.
Үөрүүлээх күҥҥэ улуустааҕы үөрэх салалтатын сүрүн уопсай үөрэхтээһин отделын салайааччыта Варвара Абрамова эҕэрдэтин эттэ. Кини уһун сыллаах эҥкилэ суох үлэлэрин, үүнэр көлүөнэ иитиитигэр сүҥкэн кылааттарын иһин үөрэҕирии салалтатын грамотатын иитээччилэр Евдокия Ивановаҕа, Матрена Николаеваҕа, Александра Егороваҕа, Ирина Борисоваҕа, Лена Потаповаҕа, Светлана Николаеваҕа, Лена Новгородоваҕа үөрүүлээх быһыыга-майгыга туттарда.
Бу күн “Мичил” оҕону сайыннарар киин үлэһиттэрин уонна иитиллээччилэрин күүстэринэн улахан кэнсиэр буолла. Манна “Мичил” уһуйааҥҥа иитиллибит эстрада сулуһа Иннокентий Лебедев-Амикан, уһуйааны 2021 с. бүтэрбит В.П.Ларионов аатынан оскуола 4-с кылааһын оҕолоро ыалдьыттаан, ырыаларынан-тойуктарынан, Ф.Г.Охлопков аатынан оскуола үөрэнээччилэрэ хомуска оонньоон эҕэрдэлээтилэр.
Өрөгөйдөөх үбүлүөйүнэн уһуйаан кэлэктиибигэр төрөппүттэр кэнчээри ыччат сайдарын туһугар кэскиллээх кылааттарын киллэрэллэригэр махталларын биллэрэннэр Эҕэрдэ суруктарын, сибэкки дьөрбөтүн туттардылар.
Евгения Максимова,
төрөппүт.
