Бүгүн, ахсынньы 27 күнүгэр, Мөҥүрүөн нэһилиэгэр «Хаарбах дьиэттэн дьону көһөрүү» федеральнай бырагырааманан 2024 сыл иһигэр тутуллан, саҥа 4 кыбартыыралаах таас дьиэ үлэҕэ киирдэ.
Мөҥүрүөн устуоруйатыгар киирэр бэлиэ күҥҥэ саҥа дьиэ арыллыытын туоһулуур кыһыл лиэнтэни кырыйар, эҕэрдэ тыллары этэр чиэс улуус дьокутааттарын сэбиэтин бэрэссэдээтэлигэр Иннокентий Андросовка, улуус баһылыгын тутуу боппуруостарыгар солбуйааччы Василий Филипповка, нэһилиэк баһылыгар Юрий Александровка, «Аурис» ХЭУо дириэктэригэр Алексей Колочевка уонна дьиэ олохтооҕор Екатерина Черкашинаҕа бэрилиннэ.
Үөрүүлээх тэрээһиҥҥэ алгыс сиэрин-туомум Петр Тихонов толордо. Тутууга кылааттарын киллэрбит үлэһиттэргэ Махтал суруктары туттардылар. Нэһилиэк баһылыгыттан күлүүстэри саҥа кыбартыыралар хаһаайыннара – «СӨ Учууталлар учууталлара» бэлиэлээх Екатерина Черкашина, СӨ үөрэҕириитин туйгуна, «СӨ Учууталлар учууталлара» бэлиэлээх Александра Петрова, элбэх оҕолоох ийэ, биэлсэр Нюргуяна Логинова, эдэр учуутал Конон Лукин туттулар.
«Мөҥүрүөн нэһилиэгэр 2013 сылтан биэлсэринэн үлэлиибин, – диэн Нюргуяна Лонгинова эттэ. – Саҥа дьиэҕэ көһөрбүттэн үөрэн-көтөн, долгуйан турабын. Иккис хостоох сылаас, сырдык толору хааччыллыылаах кыбартыыра күлүүһүн ыллым. Маннык федеральнай бырагыраама баара тыа сиригэр эдэр исписэлиистэр үлэлииллэригэр, олохсуйалларыгар олус үчүгэй».
«Эбийиэк уопсайа 184 кыбадыраат миэтэрэ иэннээх, таас блоктартан турар, биирдии уонна иккилии хостоох толору хааччыллыылаах кыбартыыралардаах, киин ититэр ситимҥэ холбонон турар, – диэн «Аурис» ХЭУо дириэктэрэ Алексей Колочев иһитиннэрдэ. – Мэҥэ Хаҥаласка уопсайа 3-с дьиэбитин киллэрэ сылдьабыт. Эһиил былаан быһыытынан Төҥүлү нэһилиэгэр үлэлиибит. Саҥа эбийиэк «Хаарбах дьиэттэн дьону көһөрүү» федеральнай бырагырааманан тутуллан үлэҕэ киирбитинэн олохтоохтору эҕэрдэлиибин уонна улуус, өрөспүүбүлүкэ салалтатыгар махтанабын», – диэтэ.
Иван Лукин.
