Кулун тутар 16 күнүгэр Дьокуускайга Арчы дьиэтигэр Оһуокай өрөспүүбүлүкэтээҕи түмсүүтүн (салайааччы А.Д.Данилов) тэрийиитинэн, Мэҥэ Хаҥалас улууһугар аналлаах Кыайыы Оһуокайа үрдүк таһымнаахтык ыытылынна.
Бу күн Дьокуускай куорат оһуокайга сүгүрүйээччилэрэ, Гаврил Колесов аатынан Олоҥхо дьиэтин үлэһиттэрэ, Мэҥэ Хаҥаластааҕы Оһуокай түмсүүтүн кыттыылаахтара киирэн эттилэр. Оһуокай түһүлгэтин иннинэ Дархан этээччи, алгысчыт Денис Оконешников алгыстаата. Алгысчыт бар дьонугар үтүөнү, эйэни түстээтэ.
Кыайыы түһүлгэтин Тараттан төрүттээх, РФ үөрэҕириитин бочуоттаах үлэһитэ, Дьокуускай куорат оскуолатын педагога Вера Гоголева саҕалаата. Ол кэнниттэн утуу-субуу түһүлгэни тимир ууһа, алгысчыт Роман Иванов, Саха сирин үтүөлээх этээччитэ Анисия Степанова, Дархан этээччилэр Денис Оконешников, Виталий Никифоров, Стас Иванов о.д.а эттилэр. Дьон-сэргэ тоҕуоруһан кэлэн, дуоһуйа үҥкүүлээтилэр.
Оһуокай түмсүүтүн аатыттан 85 сааһын туолбут юбиляр Руф Елисеевич Гаврильевка Александр Джурович аатыттан Махтал суругу, Гиннес Оһуокайын хаартысканан хартыынатын туттардыбыт.
Кыайыы Оһуокайын тэрийиигэ Мэҥэ Хаҥаластан тэринэн киирэн тэрийсибит Гаврил Колесов аатынан Олоҥхо дьиэтин дириэктэригэр Евдокия Ивановаҕа, Оһуокай түмсүү Мэҥэ Хаҥалас улууһугар салайааччыта Мария Шипошинаҕа, Мэҥэ Хаҥалас улууһун култуураҕа уонна духуобунаска управлениетын сүрүннүүр исписэлииһигэр Станислав Ивановка түмсүү аатыттан махтанабыт.
Марта Николаева.
