«Мэҥэ-Леди» автокулууп тэриллибитэ 20 сыла туолбутунан тимир көлөнү доҕор оҥостубут кэрэ аҥаардар И.М.Сосин аатынан киин бибилэтиэкэҕэ «төгүрүк остуол» тула муһуннулар.
Тэрээһин ыҥырыылаах ыалдьыттарынан Ил Түмэн дьокутаата, «Колми» ХЭУо генеральнай дириэктэрэ Наталья Румянцева, урбаанньыт, 2003 сыллаахха Аан дойдуну эргийэн кэлбит дьахталлар айаннарын биир кыттыылааҕа Вера Татаринова буоллулар. Кинилэр 80 күннээх айаннарыгар 11 араас тас дойдуну хайдах эргийэн кэлбиттэрин сырдаттылар, суолга-айаҥҥа көрсүбүт мүччүргэннээх сырыыларын кэпсээтилэр, санааларын үллэһиннилэр.
Настаабынньыктар Антонина Федорова, Людмила Пермякова, Мария Шипошина автокулууп хайдах төрүттэммитин, ыраах айаннарга сырыыларын туһунан ахтан-санаан аастылар, эдэрдэргэ сүбэлэрин биэрдилэр.
