Кулун тутар 29-30 күннэригэр Майаҕа Илин эҥэр улуустар икки ардыларыгар харахтарынан инбэлииттэр култуура уонна успуорт көрүҥнэригэр инклюзивнай бэстибээллэрэ бастакытын ыытыллар.
Манна Василий Пономарев салайааччылаах Чурапчы, Петр Башарин салайааччылаах Таатта, Александра Устинова салайааччылаах Амма, Дмитрий Аммосов салайааччылаах Уус Алдан уонна Иван Семенов салайааччылаах Мэҥэ Хаҥалас улуустарыттан мөлтөхтүк көрөр барыга дэгиттэр дьоҕурдаах дьон илин-кэлин түсүһэ кэлбиттэр.
Бүгүн, кулун тутар 29 күнүгэр, Ф.Г.Охлопков аатынан орто оскуолаҕа бэстибээл кыттыылаахтарын Майатааҕы үһүс оскуола сахалыы таҥастаах Далбар Хотуттара алгыстаах алаадьынан айах тутан көрүстүлэр. Тэрээһин үөрүүлээх аһыллыытыгар Дьокуускайтан өрөспүүбүлүкэтээҕи көрбөттөр уопсастыбаларын бэрэссэдээтэлэ Ибрагим Ишниязов, Мэҥэ Хаҥалас улууһун баһылыгын социальнай боппуруостарга уонна имиджевэй бэлиитикэҕэ солбуйааччы Альбина Григорьева, социальнай көмүскэллээх буолуу управлениетын салайааччы Иван Шестаков, социальнай бэлиитикэ управлениетын салайааччы Октябрина Кулешова кыттыыны ыллылар.
Тэрээһин дойдубут уонна өрөспүүбүлүкэбит өрөгөй ырыаларынан саҕаланна. Саалаҕа харахтарынан инбэлииттэр улуустааҕы уопсастыбалара бэйэлэрин билиһиннэрэр, араас хабааннаах тэрээһиннэргэ кыттыбыт, дьоҕурдарын көрдөрөр быыстапкалара туруоруллубут. Маны уопсастыбалар салайааччылара сырдаттылар. Манна сахалыы ас арааһа, баайыылар, кыл-сиэл, туос, мас, о.д.а. хараҕы сымнатар илиинэн оҥоһуктар бааллар.
Альбина Григорьева ыраахтан-чугастан кэлбит ыалдьыттары улуус баһылыгын, тус бэйэтин уонна олохтоохтор ааттарыттан эҕэрдэлээтэ, улууска ыытыллан кэлбит тэрээһиннэри сырдатта итиэннэ Ибрагим Михайлович Ишниязовка Эҕэрдэ суругу кытта өйдөбүнньүк бэлэҕи туттарда. Ибрагим Михайлович өрөспүүбүлүкэтээҕи уопсастыба үлэтин туһунан ахтыы оҥордо. Кини уопсастыбатын үрдүкү бэлиэтинэн өр сылларга үтүө суобастаах үлэтин иһин Нина Слепцованы, Махтал суругунан Ф.Г.Охлопков аатынан орто оскуола дириэктэрин Андрей Захаровы, доруобуйаларыгар хааччахтаах дьон уопсастыбатын бэрэссэдээтэлин Тамара Пермякованы, Октябрина Кулешованы, Иван Шестаковы, Альбина Григорьеваны наҕараадалаата. Иван Шестаков эҕэрдэлээн туран доруобуйаларыгар хааччахтаах дьон ситиһиилэрин сырдатта уонна кинилэринэн киэн туттарын эттэ итиэннэ Балыктаах харахтарынан хааччахтаах уопсастыбаларын салайааччытыгар Татьяна Цыденжаповаҕа Махтал сурук туттарда.
Улуустааҕы көрбөттөр уопсастыбаларын бэрэссэдээтэлинэн 2021 сылтан үлэлиир Иван Семенов өрөспүүбүлүкэҕэ бастакытын ыытыллар үөрүүлээх тэрээһиҥҥэ мустубут ыалдьыттары эҕэрдэлээтэ. Бу үрдүк эппиэтинэстээх уонна долгутуулаах буоларын бэлиэтээтэ. Кини успуорт бу көрүҥнэригэр ыытыллар күрэхтэһиилэргэ 5 көрүҥҥэ 6-лыы киһи хамаандаттан кыттар хааччаҕын арыый кэҥэтэргэ баҕатын эттэ. Ырыа, хоһоон, фольклор айар дьоҕурдаахтарга, каталино, дуобат, квиксо остуол оонньууларыгар, “Туох, ханна, хаһан?” эрудит-лото, “Билсэн кэбиһиэҕиҥ” хамаандалар бэйэлэрин билиһиннэрэр этээптэрин уонна дьахталларга дартс, эр дьоҥҥо голбол көрүҥнэригэр күрэхтэһии ыытылларын иһитиннэрдэ. “Мэҥэ Хаҥалас улууһа олус ыалдьытымсах уонна успуорду, култуураны өрө тутар улуус буолар. Ким ордук бэлэмнээх – ол кыайдын!”, — диэтэ.
Үөрүүлээх тэрээһин кыттыылаахтарыгар Ф.Г.Охлопков аатынан орто оскуола фольклорга уһуйааччыта Игорь Игнатьев хомуска оонньоон, Николай Игнатьев ылбаҕай ырыаларынан эҕэрдэлээтилэр.
Марелла Баишева.
