Алтынньы 11 күнүгэр Мэлдьэхси нэһилиэгэ дуобат успуордун улахан туонатыгар кубулуйда. Биир дойдулаахтарбыт, дуобат эйгэтигэр ааттарын ааттаппыт дьоһун дьон – Аан дойдутааҕы дуобат федерациятын ФМЖД Бочуоттаах бэрэсидьиэнэ Владимир Ильич Птицын, Арассыыйа дуобакка федерациятын вице-бэрэсидьиэнэ Александр Афанасьевич Романов, норуоттар икки ардыларынааҕы кылаастаах сахалартан бастакы норуоттар икки ардыларынааҕы арбитр, ФМЖД успуордун маастара Дмитрий Васильевич Сыромятников, Саха Өрөспүүбүлүкэтин үтүөлээх тириэньэрэ, ССРС успуордун маастара Василий Васильевич Куприянов бириистэригэр сүүс харахтаах дуобакка “Мэлдьэхси куубага” аһаҕас турнир ыытылынна.
Күрэхтэһиигэ 62 кыттааччы араас улуустартан уонна Дьокуускайтан кэлэн бастыыр иһин кииристилэр. Тэрээһин дуобат успуордун сайдыытыгар эрэ буолбакка, дьон доҕордоһуутугар, бэйэ-бэйэлэрин кытта алтыһыыларыгар улахан суолталааҕын тоһоҕолоон көрдөрдө.
Тэрээһин үөрүүлээх аһыллыытыгар ыраахтан-чугастан кэлбит ыалдьыттары Мэлдьэхси нэһилиэгин баһылыга Валерий Никифоров, оскуола дириэктэрэ Кирилл Титов, СӨ тыа хаһаайыстыбатыгар уонна ас-үөл бэлиитикэтигэр миниистирин солбуйааччы, билим дуоктара, улуус дуобакка федерациятын салайааччыта Сахайаана Павлова, ФМЖД Бочуоттаах бэрэсидьиэнэ Владимир Птицын, Арассыыйа дуобакка федерациятын вице-бэрэсидьиэнэ Александр Романов кэргэнэ Елена Романова, норуоттар икки ардыларынааҕы кылаастаах сахалартан бастакы норуоттар икки ардыларынааҕы арбитр, ФМЖД успуордун маастара Дмитрий Сыромятников, СӨ үтүөлээх тириэньэрэ, ССРС успуордун маастара, тэрээһин тэрийээччитэ Василий Куприянов эҕэрдэ тылларын эттилэр, кыттааччыларга ситиһиини баҕардылар.
Күүстээх киирсии түмүгүнэн кыайыылаахтар ааттаннылар: уолаттарга бастакы миэстэ Байдам Николаев, иккис Николай Попов (Дьокуускай), үһүс Арсен Иванов (Майа), кыргыттарга бастакы Лилия Яндубаева (Дьокуускай), иккис Анастасия Стручкова (Мэлдьэхси), үһүс Дария Тюнгюрядова (Дьокуускай) буолары ситистилэр.
Эр дьоҥҥо 18 саастарыттан үөһээ бастакы Прокопий Говоров (Мэлдьэхси), иккис Нил Иванов (Хаптаҕай), үһүс Алексей Большаков (Дьокуускай), дьахталларга бастакы Алена Большакова (Дьокуускай), иккис Екатерина Жиркова (Дьокуускай), үһүс Федора Иванова (Таатта), бэтэрээннэргэ эр дьоҥҥо бастакы Савва Аргунов (Хара), иккис Дмитрий Сыромятников (Мэлдьэхси), үһүс Василий Куприянов (Мэлдьэхси), бэтэрээн дьахталларга бастакы Анастасия Собакина (Амма), иккис Антонина Федорова (Майа), үһүс Мария Третьякова (Төхтүр) миэстэ буоллулар.
Бу күн дуобакка успуорт маастарыгар кандидат, үлэ, успуорт бэтэрээнэ Василий Семенович Степанов аатынан анал бириис Ангелина Андрееваҕа туттарылынна. Үлэ, успуорт бэтэрээннэрэ, дуобакка успуорт маастарыгар хандьыдааттар Николай Николаевич уонна Дмитрий Николаевич Степановтар, саахымакка Саха Өрөспүүбүлүкэтин экс-кыайыылааҕа, ССРС саахымакка успуорт маастарыгар хандьыдаат Владимир Андреевич Колесов ааттарынан анал бириис хаһаайынынан Мэлдьэхси эдэр, кэскиллээх дуобатчыта Айталыына Степанова буолла. Мэлдьэхси нэһилиэгин биэлсэр-акушер пуунун анал бирииһинэн Вова Николаев наҕараадаланна.
“Мэлдьэхси куубага” быйылгы күрэхтэһии муҥутуур кыайыылааҕынан Дьокуускайтан гроссмейстер разрядтаах Гаврил Колесов ааттанна, Владимир Птицын аатыттан убаһа бириис туттарылынна. Киниэхэ улахан эҕэрдэ!
Кэлбит кыттааччылар бары үөрэн-көтөн, миэстэлэһэн, дуобат күүһүнэн дьону кытта алтыһан, бэрт сэргэх күнү атаардылар. Дуобат чулууларын көрөн, эдэр дуобатчыттар саҥа кыайыыларга көҕүлэннилэр. Кыттыыны ылбыт бары кыттааччыларга уонна тэрээһини тэрийсибит дьоҥҥо барыгытыгар барҕа махталбытын тиэрдэбит!
Дуобат успуорда Сахабыт сиригэр өссө күүскэ сайда, чэчирии турдун!
Арылхан Сокольников, 10 кылаас үөрэнээччитэ, А.В. Чугунов аатынан Мэлдьэхси орто оскуолатын
“Үктэл” медиа-киинин кэрэспэдьиэнэ
