Бэс ыйын 5-25 күннэригэр Майа сэлиэнньэтигэр оҕо-ыччат успуордун оскуолатын иһинэн «Манчаары» лааҕыр үлэлээтэ.
«Манчаары» лааҕыр футболгҮа уонна оҕунан ытыыга 25-тии оҕону хабар. Успуорт оскуолатыттан оҕунан ытыыга тириэньэр-преподаватель Айталы Артамонова уонна футболга тириэньэр-преподаватель Эдуард Афанасьев оҕолору дьарыктыыллар.
Лааҕыр иитиллээччилэр талбыт успуортарын көрүҥэ сайдарын туһугар кыһаллаллар уонна кэлэр күрэхтэһиилэргэ бэлэм буолаллара сүрүн сыалы-соругу туруораллар.
Ф.Г.Охлопков аатынан Майа орто оскуолатын үөрэнээччитэ Сайыына Артамонова (тириэньэрэ Прокопий Васильев), Саха сиригэр оҕунан ытыыга бастыыр иһин күрэхтэһиигэ кыайыыны ситиһэн, өрөспүүбүлүкэ хамаандатыгар киирсэн, Арассыыйаҕа бастыыр иһин күрэхтэһиигэ кытта бараары сылдьар. Оттон футбол лааҕырын иитиллээччилэрэ Арассыыйатааҕы «Кожаный мяч» күрэхтэһиигэ бэлэмнэнэллэр.
Ф.Г.Охлопков аатынан Майа орто оскуолата итии, тотоойу, битэмииннээх, минньигэс аһынан успуорт лааҕырын үлэлиир кэмигэр толоро хааччыйарыгар «Манчаары» иитиллээччилэрэ уонна иитээччилэрэ махтаналлар.
Оҕунан ытыы лааҕыр иитиллээччилэрэ эбиэт кэннэ оҕо-ыччат успуордун оскуолатын иһигэр айар дьоҕурдарын сайыннарбыттара: хаамысканан уруһуйдаабыттара, туой буорунан араас оҥоһуктары оҥорбуттара, ас астаабыттара, хомустаабыттара, олоҥхолообуттара, уо.д.а. араас куонкурус, тэрээһин, маастар-кылаас тэриллибитэ.
Оҕолор успуорт эйгэтин талан, лааҕыры сөбүүлэн биир да күнү көтүппэккэ, сарсыарда хойутаабакка үөрэ-көтө дьарыктана, эрчиллэ сылдьаллар.
