Дьокуускайга ыытыллыбыт «Розовая чайка» норуоттар икки ардыларынааҕы куонкуруска 1.700 талба талааннаах оҕо, эдэр ыччат тоҕуоруһа муһунна. Арассыыйа 8 эрэгийиэнин, Индия, Монголия, Казахстан бастыҥнарын түһүлгэтигэр М.К.Попова аатынан Майатааҕы оҕо ускуустубатын үөрэнээччилэрэ үрдүк таһымнаахтык кытыннылар.
Светлана Маркова салайааччылаах Вилена Цыпандина – соло толорууга, эдьиийдии балыс Нарияна уонна Карина Романовалар фортепианоҕа дуэттара – ансаамбыллар кэккэлэригэр 2-с истиэпэннээх лауреат буолары ситистилэр. Ванда Нестерова салайааччылаах Нарыйаана Олесова оркестр үнүстүрүмүөннэригэр скрипкаҕа оонньоон дипломант аатын ылла. Киэҥ хабааннаах куонкурус кыттааччылара ирдэбил быһыытынан түөртүү айымньыны толорон уустук тургутууну ситиһиилээхтик аастылар.
Үһүс төгүлүн ыытыллар куонкурус Арассыыйаҕа Норуоттар сомоҕолоһууларын, Саха сиригэр Култуура сылларыгар ананна. Тэрээһин дойду Бэрэсидьиэнин «Дьиэ кэргэн» национальнай бырайыагын сыалын-соругун олоххо киллэриигэ туһуланар. Уопсайа 9 хайысхаҕа – фортепиано, «Муусука – барыбытыгар», оркестр үнүстүрүмүөннэрэ, нуучча норуотун үнүстүрүмүөннэрэ, кэлэктиибинэн музицирование, хуорунан ырыа, хорография, норуот муусукаалынай айымньыта уонна билим, мэтэдиичэскэй үлэлэр кэккэлэригэр кыайыылаахтар ааттаннылар.
Куонкурус чэрчитинэн ыытыллыбыт «Муусука – барыбытыгар» бырайыак уопут атастаһыытын түһүлгэтигэр Майатааҕы оҕо ускуустубатын скрипка салаатын сэбиэдиссэйэ Ванда Нестерова кытынна. Кэнчээри ыччаты скрипкаҕа уһуйар учуутал «Муусукалыын олох суолун устун» дакылаатыгар араас эйгэҕэ үлэлиир үөрэнээччилэрэ скрипканы олохторун аргыһа оҥостон ситиһии кынаттаналларын туһунан сырдатта. Бэлиэ түгэҥҥэ араас сылларга бүтэрбит выпускниктара скрипка ансаамбылыгар сомоҕолоһон тэрээһини киэргэттилэр.
Светлана Маркова, Майатааҕы оҕо ускуустубатын оскуолатын учуутала:
– Олус тыҥааһыннаах икки түһүмэхтээх куонкурус буолла. Кыттааччылар бары бэлэмнээхтэр, таһымнаахтар. Иккис түһүмэххэ киирбит кыттааччылар улахан сүүмэрдээһини аастылар, уопсайа түөртүү айымньыны тыаһаттылар. Элбэх айымньыны үөрэтии сыралаах үлэттэн, дьулууртан, тулууртан тахсар. Вилена Цыпандина П.И.Чайковскай «Ноктюрн», Э.Григ «Шествие гномов», В.А.Моцарт «Соната», З.Степанов «Ритуальный танец шамана», эдьиийдии балыс Нарияна уонна Карина Романовалар дуэтынан А.Грибоедов «Вальс», К.Хачатурян «Галоп», Г.Комраков «Осенняя серенада» уонна А. Хачатурян «Танец с саблям» толордулар. Кыргыттар үрдүктүк сыаналанан лауреат буоллулар. Түгэнинэн туһанан, дириэктэрбитигэр Василий Захаровка, төрөппүттэрбэр өйөбүллэрин иһин махтанабын. Кыайыыбытын фортепиано салаатын сайдарыгар сүҥкэн кылааттаах сүбэһитим, кэргэним Семен Марков сырдык аатыгар аныыбын.
Ванда Нестерова, Майатааҕы оҕо ускуустубатын учуутала:
‒ Олус киэҥ бырагыраамалаах, дириҥ ис хоһоонноох куонкурус буолан ааста. Муусукаҕа таптал, норуоттар доҕордоһуулара, дьулуурдаах үлэ үтүө түмүгэ барыта биир түһүлгэҕэ сомоҕолосто. Оркестр үнүстүрүмүөннэрин хайысхатыгар икки үөрэнээччини – Нарыйаана Олесованы уонна Лилия Нестерованы кытыннардым. Нарыйаана Олесова дипломант буолла. Уопут атастаһыытын түһүлгэтигэр үөрэнээччилэрим муусука кэрэ эйгэтин кытта кэккэлэһэн Арассыыйа, тас дойдуларга айымньылаахтык үөрэнэллэрин, үлэлииллэрин сырдаттым. Бу күн үөрэнээччилэрим Аня Андреева, Аля Егорова, Сардаана Кычкина, Сахая Макарова, Саша Петрова, Катя Попова, Галя Христофорова, Ксюша Соловьева. Аня Тарасова ансаамбылынан уонна Галя Христофорова соло толоруунан скрипка кэрэ тыаһын бэлэхтээбиттэрэ олус үөрүүлээх уонна долгутуулаах түгэн буолла. Бу курдук, оскуолабыт муусукаҕа тапталы иитэр сүдү үөрэҕэ кэнчээри ыччакка киэҥ аартыгы арыйар.
Изабелла Романова
