1902 сыл муус устар 11 күнэ. Бу күн тутуута саҕаламмыт Васильевскай таҥара дьиэтэ үлэлииригэр Император Николай Александрович бигэргэтэн ыйаахтаабыт күнэ Майа төрүттэммит күнүнэн билиниллэр.
Онтон ыла 123 сыл ааста. Бу күн биһиги Майаҕа төрөөн-үөскээн, олорон-үлэлээн, айан-тутан ааспыт, биллэр-көстөр суолу-ииһи хаалларбыт, сайдыыны уһансыбыт ытык үлэһит дьоммутун киэн тутта ааттыыр, махтал тылларбытын аныыр күммүт. Кинилэр үлэлэрин салгыы ыытар, үтүө холобурдарынан оҕолорбутун-ыччаттарбытын иитэр, кинилэр ааттарын үйэтитэр ытык иэстээхпит.
И.М.Сосин аатынан улуустааҕы киин бибилэтиэкэ сүрүннүүр бибилэтиэкэрэ Марианна Ефимова үс күн устата оҕолорго анаан “Майа – дойдум барахсан” бибилэтиэкэ уруогун ыытта, Майа туһунан кинигэлэри көрдөрдө, билиһиннэрдэ: «Майа сэлиэнньэтэ» (2002 с.), «Сайдар Майабыт» (2017 с.), «Майа: Докумуоннар, Ыстатыйалар. Хаартыскалар» (2021 с.).
Майабыт устуоруйатын үүнэр ыччат билиэхтээх, киэн туттуохтаах. Түмүгэр истибиттэрин, билбиттэрин тургутар «Мин Майам» диэн өй-санаа оонньуута буолла. Онно кыайыылааҕынан Доминика Цыпандина уонна Виолетта Луковцева таҕыстылар.
Марина Трифонова.
