В.П.Ларионов аатынан Майа орто оскуолатыгар тэриллибит «АйСитим» оҕо сынньалаҥ лааҕырыгар быйылгы сылга түөрт этэрээт үлэлээтэ. Манна олус элбэх оҕо сөбүлээн сырытта.
«Сардаҥалар» этэрээккэ ырыа алыптаах эйгэтигэр уһуйуллан, оҕолор дуоһуйа сынньанан аастылар.
Уопсайа 25 араас саастаах оҕо хабыллан, лааҕыр кэмигэр ырыа ыллаан, оонньоон-көрүлээн, субуотунньукка кыттан, сыыс от ыраастааһыныгар көмөлөһөн, кыраайы үөрэтэр түмэлгэ сылдьан бириэмэлэрин билбэккэ атаардылар.
Түмүктүүр күннэригэр төрөппүттэргэ анаан үөрэппит ырыаларын, үҥкүүлэрин кэнсиэринэн бэлэхтээтилэр, үгүс сэҥээрини ыллылар.
Салайааччыларынан муусука учуутала Светлана Борисова, көмөлөһөөччүнэн Намнааҕы педколледж 4 куурус устудьуона, оскуолабыт выпускнига Надежда Местникова үлэлээтилэр.
«Боотур» тустуу этэрээтигэр бэс ыйын 5 күнүттэн 25 күнүгэр диэри 25 эдэр тустуук уолаттар сырыттылар. Салайааччынан Константин Колесов үлэлээтэ. Эдэр тустууктар дьарыктара сэрээккэнэн, кросстан, эти-ханы уһугуннарар хачайданыы эрчиллиинэн саҕаланар. Эбиэт кэннэ күүстээх дьарыктаныылар буоллулар. Оҕолор оскуолабыт остолубуойугар тото-хана аһыы сырыттылар. Маны сэргэ, дьарык кэннэ сынньалаҥы да умнубакка киинэ тыйаатырыгар баран киинэ көрдүлэр. Майа, Хара ыһыаҕар хапсаҕай күрэхтэһиитигэр кыттан, кыайыы өрөгөйүн биллилэр. Лааҕыр түмүктэниитэ ыһыылаах-хаһыылаах түмүктүүр түһүлгэ күрэхтэһиитэ тэрилиннэ. Кыайыылаахтар мүһэнэн наҕараадаланнылар. Оҕолор бары да «Боотур» лааҕыры олус сөбүлээтилэр.
«АБВГД» оскуолаҕа бэлэмнэнии этэрээт оҕолоро, быйыл аан маҥнайгытын оскуола боруогун атыллыахтаах кырачааннарбыт маҥнайгы учууталларын кытта элбэхтик оонньуу нөҥүө бэйэ-бэйэлэрин кытта билсэн, доҕордуу, эйэлээх буоларга үөрэннилэр. Оскуола, үөрэнээччи быраабылатын кытта сиһилии билистилэр. Билиилэрин хаҥатан кыраайы үөрэтэр түмэлгэ, киин библитиэкэҕэ сырыттылар. Салайааччыларынан Туяра Дмитриева, Любамира Жегусова, Алена Кононова, пединститут практикана Айыына Михайловна үлэлээтилэр.
«Summer kids” 5 «в» кылаас оҕолоругар английский тыл хаҥатарга аналлаах этэрээт тэриллибитэ. Оонньуу, ырыа, дьарыктар нөҥүө билиилэрин хаҥаттылар, үөрэннилэр. Ону тэҥэ салайааччыларын Светлана Семенованы уонна естественнэй наука институтун практиканын Альбина Юрьевналыын бохуокка, киинэҕэ, гидробол оонньууга бириэмэлэрин бэһиэлэйдик атаардылар.
Светлана Ефимова.
