Ыам ыйын 19 күнүгэр Улуу Кыайыы 80, Майа сэлиэнньэтэ төрүттэммитэ 123, Майаҕа Төрүччү сылларынынан уонна Түмэл норуоттар икки ардыларынааҕы күнүн чэрчитинэн «Дьол түһүлэгэ» уопсастыбаннай кииҥҥэ Майа устуоруйатын көрдөрөр түмэл арыллынна.
Майа төрүттэнэн, сайдан иһэр хаамыытын, ону кытта тэҥҥэ олохтоох дьонун-сэргэтин олоҕо уларыйыытын көрдөрөр түмэлгэ кыра туттар маллартан саҕалаан дьиэ миэбэлигэр тиийэ араас экспонаттары кэллиэксийэньиэрдэр аҕалбыттар.
Тэрээһиҥҥэ кэлбит дьоҥҥо Зиновий Игнатьев алгыһын анаата, Сардана Осипова ырыанан эҕэрдэлээтэ. Түмэли тэрийээччини уонна салайааччыны, Майа сэлиэнньэтин Бочуоттаах гражданинын, кэллиэксийэньиэри Нина Никанорованы Майа сэлиэнньэтин баһылыга Алексей Неустроев, «Түмэн» уопсастыбаннай түмсүү салайааччытын солбуйааччы Людмила Пивоварова, биир идээлээх кэллиэксийэньиэрдэр эҕэрдэлээтилэр, аалай лиэнтэни кырыйдылар.
Нина Никанорова, Майа устуоруйатын түмэлин туһунан:
– Майа түмэлин арыйар кэпсэтии быйыл олунньу ый бүтүүтэ саҕаламмыта. Салгыы үлэни тэрийэргэ «Дьол түһүлгэтэ» уопсастыбаннай кииҥҥэ хос анаммыта. «Абылаҥ» кэллиэксийэньиэрдэр түмсүүлэрин салайааччылара Анатолий Егоров бастакы экспонаттары – Майа сэлиэнньэтин уһун үйэлээхтэрин (долгожители) Рыбкиннар дьиэ кэргэн малларын биэрэн олук уурбута. Элбэх экспонаттары Анна Романова аҕалла. Кини 3 №-дээх оҕо уһуйаанын оонньуурдарын, тутта сылдьыбыт тэриллэрин, миэбэлин туттарда.
Сэлиэнньэ устуоруйатын түмэлэ буолан, киирии ааҥҥа Майа олохтонуутугар тутуллубут Таҥара дьиэтин хаартыскатын ыйаатым. Сүрүннээн сэбиэскэй кэм саҕана үлэлээн сэлиэнньэни, улууһу хааччыйа сылдьыбыт промкэмбинээт, быткэмбинээт оҥоһуктарын мустум.
Кэлин устуоруйаны толору, сиһилии көрдөрөргө хос эрэ буолбакка, тус түмэл дьиэтэ көстүө диэн эрэллээхпин, — диэн санаатын эттэ.
Иван Лукин.
