Ахсынньы 22 күнүгэр «Майа сэлиэнньэтэ» тыа сирин түөлбэтин баһылыгын Алексей Неустроев сыллааҕы үлэтин отчуота ыытылынна. Тэрээһиҥҥэ сэлиэнньэ олохтоохторугар Д.Ф.Ходулов аатынан норуот айымньытын саалатын улахан экраныгар 2025 сыл устата араас салааларынан барбыт үлэлэрин, ситиһиилэрин көрдөрөн кэпсээтилэр уонна кэлэр сыл сыалларын-соруктарын сырдаттылар.
Отчуотуур үлэҕэ Алексей Иннокентьевиһи кытта бастакы солбуйааччыта Дмитрий Игнатьев, олох-дьаһах, хомунаалынай хаһаайыстыба уонна тутуу эйгэтигэр солбуйааччы Март Андреев, сэлиэнньэ дьокутааттарын сэбиэтин бэрэссэдээтэлэ Тимофей Нестеров уонна Майаҕа өҥө-хааччыйыы сулууспаларын эппиэттээх үлэһиттэрэ кыттан олохтоохтортон киирбит ыйытыыларга толору хоруйдары биэрдилэр.
Майа дьоно-сэргэтэ сэлиэнньэ суолларыгар салгыы ыытыллар тупсарыы үлэтин, оҕо оонньуур былаһааккаларыгар видеонан кэтээн көрүү холбонуутун, ис-тас өттүгэр хайдах өрөмүөн үлэтэ тэриллэрин уонна аттынааҕы суолларыгар сэрэтэр бэлиэлэри туруорар наадалааҕын, орто уонна кырдьаҕас саастаах дьоҥҥо интэриниэт ситимигэр өҥө (ЖКХ, ДЭК, о.д.а) төлөбүрүн оҥорорго үөрэтии, кирдээх ууну тиэйэр массыына аҕыйаҕын, Аркадий Новиков аатын «Көөчөөн көрө» мини тыйаатырга иҥэриини, көлүччэ ахсаана элбиирэ кутталы үөскэтэрин, урукку өйдөбүнньүк пааматынньытары чөлүгэр түһэриини, о.д.а. боппуруостары, сэлиэнньэ олохтоохторун иннигэр турар кыһалҕалары таарыйан ыйытыылары биэрдилэр, туруорустулар.
Тэрээһин түмүгүнэн мунньахха кэлбит 192 олохтоох Майа сайдарын, тупсарын туһугар таһаарыылаах үлэлээх Алексей Неустроев хамаандатыгар өссө элбэх ситиһиини, кыайыыны, саҥа арыйыылары баҕардылар.
Иван Лукин.
