Бүтүн Арассыыйатааҕы сүүрүү уонна хаамыы күнүн чэрчитинэн Майа сэлиэнньэтигэр балаҕан ыйын 23 күнүгэр сыллата ыытыллар «Нациялар куруостара – 2026» буолла.
Успуорт бырааһынньыгар кэлбит Майа бары оскуолаларын үөрэнээччилэрин, инникигэ эрэллээх, киэн туттар ыччаттарын, успуорду таптааччылары, сүүрүүнү сэҥээрээччилэри, бастыҥ спортсменнары улуустааҕы үөрэх управлениетын иитэр үлэҕэ уонна эбии үөрэхтээһиҥҥэ салаатын кылаабынай исписэлииһэ Милан Илларионов, РФ үөрэҕириигэ уонна иитиигэ бочуоттаах үлэһитэ, СӨ үөрэҕириитин туйгуна, СӨ физическэй култуураҕа уонна успуорка туйгуна, улуус чэпчэки атлетикаҕа сүрүн тириэньэрэ, тэрээһин кылаабынай судьуйата Дмитрий Павлов, «Урожай» физическэй култуура, успуорт уопсастыбатын бэрэссэдээтэлэ, СӨ физическэй култуураҕа уонна успуорка туйгуна Виталий Пестряков эҕэрдэлээтилэр. Бары сүүрээччилэргэ Арылхан Касьянов ылбаҕай ырыатын бэлэхтээтэ.
Оҕо поликлиникатыттан саҕалаан Майинскай уонна Сэбиэскэй уулууссанан «Аверс» маҕаһыыҥҥа диэри 1000 кэриҥэ кыттааччы 5 бөлөххө арахсан сүүрдүлэр: 1000 миэтэрэҕэ – 1-4 кылаастар, 2000 миэтэрэҕэ – 5-8 кылаастар, 9-11 кылаастар, тэрилтэлэр үлэһиттэрэ уонна бэтэрээннэр.
Түмүккэ 5 бөлөх кыайыылаахтарыгар «Нациялар куруостара – 2026» диэн анал футболкалары бэлэхтээтилэр уонна үс бастакы миэстэни ылбыттарга мэтээллэри, грамоталары туттардылар.
Чөл олоҕу тутуһар, успуордунан дьарыктанар, доруобуйатын көрүнэр, болҕомтолоохтук сыһыаннаһар киһи бэйэтигэр эрэллээх буолар, олоҕун таһыма тупсар, уһун үйэлэнэр. Чэгиэн буолуоҕуҥ, этэҥҥэ сылдьыаҕыҥ!
Иван Лукин.
