Улуус баһылыгын 2024 сыллаах үлэтин отчуота ахсынньы 25 күнүгэр Майа сэлиэнньэтигэр ыытылынна.
Д.Ф.Ходулов аатынан култуура киинин саалатыгар толору мустубут олохтоохтор отчуоттуур мунньах иннигэр буолбут үөрүүлээх түгэн туоһуларынан буоллулар. В.А.Вонгродскай аатынан Дьокуускайдааҕы медицинскэй колледж дириэктэрэ Дмитрий Алексеев, “Мэҥэ Хаҥалас улууһа” муниципальнай оройуон баһылыга Дмитрий Тихонов уонна улуустааҕы киин балыыһа кылаабынай бырааһа Иннокентий Павлов эһиилги үөрэх сылыттан Майа сэлиэнньэтигэр медицинскэй колледж салаатын арыйар туһунан үс өрүттээх сөбүлэҥҥэ илии баттаабыттарын мустубут дьон дохсун ытыс тыаһынан эҕэрдэлээн, үөрэн-астынан ылыннылар.
Колледж дириэктэрэ Дмитрий Афанасьевич Алексеев иһитиннэрбитинэн, 17 биэлсэр уонна 17 медсиэстэрэ миэстэтигэр үүнэр сыл бэс ыйыттан саҕалаан докумуоннары тутан саҕалыахтара. Бу 34 миэстэҕэ сааһынан хааччаҕа суох үөрэнэ киирээччилэр судаарыстыба суотугар босхо үөрэниэхтэрэ, кинилэргэ истипиэндьийэ төлөнүө. Ону таһынан намыһах дохуоттаах, анал байыаннай дьайыыга сылдьар дьонноох дьиэ кэргэн оҕолоругар социальнай истипиэндьийэ, барар-кэлэр ороскуоттара, тулаайахтарга анал босуобуйа төлөнөр. Куонкуруһу ааспататахтар өссө эбии 7-лии миэстэҕэ төлөбүрдээх үөрэххэ киириэхтэрин сөп эбит. Кини улуус уонна киин балыыһа салалталарын дьүккүөрдээх туруорсууларынан улууска доруобуйа харыстабылын тэрилтэлэригэр каадыр тиийбэт кыһалҕатын быһаарыыга дьоһун хардыы оҥоһуллубутунан эҕэрдэлээтэ.
Салгыы Дмитрий Тихонов баһылык гранын сүүйбүт улуус уран тарбахтаах маастардарыгар 60-80-100 тыһыынча солкуобай суумалаах харчынан өйөбүл туоһу суруктарын туттарда. Ону Майатааҕы Үһүс көлүөнэ оскуолата, Мэҥэ Хаҥалас маастара Варвара Дьячковская, “Кэрэ иис” түмсүү, “Туойаана” мастарыскыай, “Түмэн” түмсүү иис сыаҕа, тимир ууһа Андрей Каратаев үөрүүлээх быһыыга-майгыга туттулар.
Баһылык 2024 сыллаах үлэни улахан экраҥҥа кэнники 3 сыллаах көрдөрүү тэҥнэбилин туһанан отчуоттаата. Нэһилиэнньэни кытта көрсүһүүгэ норуот дьокутааттара Андрей Находкин, Тихон Скрябин, оройуон сэбиэтин бэрэссэдээтэлэ Иннокентий Андросов, баһылыгы социальнай боппуруостарга, имиджевэй бэлиитикэҕэ солбуйааччы Альбина Григорьева, Майа сэлиэнньэтин баһылыга Алексей Неустроев, управлениелар, тэрилтэлэр салайааччылара кыттыыны ыллылар.
Отчуоту дьүүллэһиигэ олохтоохтор ыйытыы биэрэн, санааларын, кыһалҕаларын этинэн көхтөөхтүк кытыннылар. Дмитрий Титов отчуот сонун көрүҥүнэн барбытын биһирээбитин этэн туран, күһүҥҥү «Идэһэ» дьаарбаҥканы дьон өрүүр күнүгэр тэрийэр сөптөөҕүн, үгүс киһи сүһүөх ыарыытыттан эрэйи көрөр, улууска балыыһаҕа ревматология салаата арыллара буоллар, «Дьол түһүлгэтэ» киин балаҕанын кэҥэтэн уопсастыбанньыктар түмсэллэригэр табыгастаах оҥорор наадатын туруоруста.
Ариадна Филиппова улууска доруобуйа харыстабылын эйгэтигэр, маассабай успуорду тэнитиигэ биллэр-көстөр үлэ барбытын бэлиэтээтэ. Кузьма Бурнашев тиэхиньикэни гаас уматыкка көһөрөргө туох дьаһал ылылларын сураста, ыччаты тыа сиригэр олохсутарга, усулуобуйаны тэрийэргэ туһуланар бырагыраама наадатын, судаарыстыба өйөбүлүн биэ ахсааныгар хаалларары көрдөһөрүн туһунан эттэ. Мэҥэ Хаҥаласка такси, оптуобус сыаналара атын улуустарга тэҥнээтэххэ ыараханын, өрөспүүбүлүкэттэн эбэтэр улуустан субсидияланара сөптөөҕүн Михаил Егоров туруоруста.
Чааһынай дьиэҕэ олорор сэрии сылын оҕолоругар, тыыл бэтэрээннэригэр «Хаарбах дьиэттэн көһөрүү» курдук анал бырагыраама ылылларын, тыа хаһаайыстыбатынан дьарыктанааччыларга өйөбүлү ынах ахсааныгар биэрэр сөбүн, «Набережнай» түөлбэ ыалларыгар мелиорация хочуолунайыттан ситим тардан уунан хааччыйар табыгастаах буолуоҕун туһунан түөлбэ салайааччыта Нина Никанорова эттэ. Ытык кырдьаҕас Александр Андреев нэһилиэк сайдыытын 5-10 сыллаах былаанын ылынан үлэлиир наадатын ыйда, судаарыстыбаттан кэлэр көмө көдьүүстээх, түмүктээх буолуохтаах, ыччаты, оскуоланы тыа хаһаайыстыбатыгар сыһыарыахха диэтэ.
Афанасий Борисов сир үлэтигэр үбүлээһин ыһыыга хойутаан кэлэр, онон эрдэттэн, бастакы кыбаарталтан хамсыырын ситиһэри, өйөбүл харчыны эккэ уонна үүккэ биэрэри сөптөөҕүнэн ааҕарын, дьон миэстэтигэр бэйэ бородууксуйатын ылар усулуобуйатын тэрийэри, нэһилиэк аайы кэпэрэтииптэр наадаларын, бааһыналары чөлүгэр түһэриигэ үлэлиири туруоруста. Ыччаты тыа хаһаайыстыбатыгар үлэлии тахсарын ситиһиэххэ, оскуолаҕа иитэр-өйдөтөр үлэни күүһүрдүөххэ диэн Анатолий Чичахов бэлиэтээтэ. Сүөһүлээх дьоҥҥо сир нолуогун аччатан биэриэххэ, сүөһүтэ суох дьоҥҥо үрдэтиэххэ диэн кэккэ этиилэри Иван Слепцов оҥордо.
Нэһилиэктэргэ сыбаалка, бөҕү, туттуллубут убаҕаһы таһар массыыналар үлэлэрин, өрүһүнэн сырыы ордук суол хаайтарыытын кэмигэр ыарыырыгар туох үлэ ыытылларын туһунан Иван Новгородов чопчуласта.
Андрей Находкин олохтоох бэйэни салайыныы реформатын сокуонун быһааран биэрдэ, тыа хаһаайыстыбатыгар, оҥорон таһаарыыны сайыннарыыга бэйэтин көрүүлэрин үллэһиннэ.
Түмүккэ улуус баһылыга Дмитрий Тихонов Майа олохтоохторугар сиэрдээх этиилэрин, туруорсууларын иһин махтанна, үүнэр сылга барыларыгар этэҥҥэ буолууну, ил-эйэ олохтонорун баҕарабын диэтэ.
Февронья ОХЛОПКОВА.
