Улуус баһылыгын сыллааҕы үлэни сырдатар отчуота Майа сэлиэнньэтигэр ахсынньы 26 күнүгэр ыытылынна.
Майа сэлиэнньэтигэр отчуоту 235 киһи иһиттэ. Тэрээһини сэлиэнньэ баһылыга Алексей Неустроев иилээн-саҕалаан ыытта. Нэһилиэнньэни кытта кэпсэтиигэ Ил Түмэн дьокутаата Олег Марков, оройуон Сэбиэтин бэрэссэдээтэлэ Иннокентий Андросов, тэрилтэ салайааччылара кытыннылар. Олохтоохтор сэлиэнньэ сайдар тускулун туруорсар, долгутар тус боппуруостарын көхтөөхтүк ыйыттылар.
Тыа хаһаайыстыбатын хайысхатыгар сылгыны иитии, страховкалааһын, үлэһиттэри хамнастааһыҥҥа судаарыстыбаттан өйөбүл, бэйэ бурдугун үүннэрии, олох-дьаһах өҥөлөрүгэр чааһынай тиэргэннэртэн уот остуолбаларын көһөрүү, сыбаалка уутун көрүү-истии, кураанах бөҕү-саҕы ыраастааһын, хаарбах дьиэттэн көһөрүү, эргэ тутуулары көтүрүү, уулуссалары сырдатыы, «Мүрү» суолун өрөмүөннээһин, доруобуйа харыстабылыгар босхо эминэн хааччыйыы туһунан ыйытыылар киирдилэр.
Сылгы иитиитинэн дьарыктанар бааһынай хаһаайыстыбалаах Иван Бурнашев чэпчэтиилээх эбиэс көрүллүүтүн биһириирин, сылгы оһолго түбэһэрэ үгүһүнэн страховка көрүллэрэ тоҕоостооҕун бэлиэтээтэ. Лесопуун түөлбэтин олохтоохторо 29 ыал тэлгэһэтигэр турар уот остуолбаларын көһөрүүнү туруорустулар.
«Көмүс кэм» уопсастыбаннай холбоһук салайааччыта Ариадна Филиппова чөл олоҕу көҕүлүүр аҕам саастаах көлүөнэ ыйга 500 килэмиэтир хааман доруобуйаларын бөҕөргөтөллөрүн туһунан сырдатта. Хомуньуус баартыйа бэрэстэбиитэллэрэ И.В. Сталин, Ф. М. Сыроватскай пааматынньыктарын туруорууга этии киллэрдилэр.
Изабелла Романова.
