Майа лиссиэйигэр инженернэй үөрэхтээһин бырайыага ситиһиилээхтик үлэлиир

Арассыыйа эрэгийиэннэригэр инженернэй үөрэхтээһин тиһигэр саҥардыллыы үлэтэ саҕаланна.  Дойдубут Бэрэсидьиэнэ Владимир Путин ити хайысха саҥа соруктарын бэлиэтээн турар. Соруктартан сүрүнэ – үрдүк таһымнаах инженердэри, оробуочайдары бэлэмнээһин.

Майа лиссиэйэ олунньу 20 – кулун тутар 13 күннэригэр Мэҥэ Хаҥалас улууһун оскуолаларыгар идэҕэ хайысхалаах педагогическай эспэдииссийэ ыытта. Эспэдииссийэ соруга – политехническэй, инженернэй идэҕэ дьоҕурдаах оскуола уолаттарын тургутуу. Аллараа Бэстээх, Төҥүлү, Наахара, Табаҕа, Хара, Майа, Павловскай, Хорообут эргиннээҕи оскуолалар түмсүүлэригэр (18 оскуола) 250 үөрэнээччини хапта. Эспэдииссийэни Майа лиссиэйин дириэктэрин үөрэх чааһыгар солбуйааччы Сардаана Борисова салайда. Педагог-психолог Саргылаана Сосина «Профперспектива 4.2» ньыматынан 4-8 кылаас уолаттарын чинчийдэ. Информатика, физика, математика, биология, химия, англия тылын учууталлара судаарыстыбаннай эксээмэннэргэ сүбэлэри биэрдилэр. Төрөппүттэргэ анаан инженернэй-технологическай хайысха кэскилин туһунан интерактивнай былаһаакка үлэлээтэ. Маны таһынан 4-8 кылаас уолаттарыгар анаан политехническэй олимпиада ыытылынна. 16 призер ааттанна. Ити олимпиада түмүгүнэн ыҥырыллан, сааскы уһун өрөбүл кэмигэр 3 күн устата Майа лиссиэйигэр «Уоланнар инженернэй оскуолалара» уонна үгэс буолбут сааскы уһун өрөбүл оскуолата холбоһоннор, көхтөөхтүк үөрэх ыытылынна. Барыта улууспут нэһилиэктэриттэн 63 оҕо билиитин хаҥатта, көхтөөхтүк сынньанна. 7 экспериментальнай лаборатория, сүрүн биридимиэттэргэ дириҥэтэн үөрэтии тэрилиннэ. «Инженернэй бырайыактааһын», «IT-Хакатон», «3Д-моделлааһын» уо.д.а. умсугутуулаах маастар-кылаастары лиссиэй учууталлара, ситиһиилээх үөрэнээччилэрэ ыыппыттарын оҕолор сэргээтилэр. Лабораторияларга интэриэстэринэн арахсан, бырайыак оҥорон көмүскээтилэр. Метапредметнэй олимпиадаҕа билиилэрин, сатабылларын көрдөрдүлэр.

Салгыы сайын «Кэлэр кэм инженердэрэ. Техноэтэрээт» лааҕыр аанын улуус оҕолоругар тэлэччи аһыаҕа. Бу бырайыак алтынньыга инженернэй компетенциялары тургутар чөмпүйэнээтинэн түмүктэнэрэ күүтүллэр. 2 бастыҥ үөрэнээччи Долгопруднай куоракка П.Л.Капица аатынан физтехлиссиэйгэ стажировкалана барыаҕа.

Бырайыак Мэҥэ Хаҥалас улууһун баһылыга Д.И.Тихонов политехническэй үөрэхтээһини өйүүр гранын чэрчитинэн ыытыллар. Майа лиссиэйин кэлэктиибэ биир сүбэнэн улууспутугар тыа сириттэн саҥа кэм инженердэрин иитэн-үөрэтэн таһаарар кэскиллээх сыалынан салайтарар. «Росатом оскуолалара», «МФТИ хайысхалаах кылаастара», «Кэлэр кэм кода» федеральнай бырайыактарга Майа лиссиэйэ кыттан, инженернэй уонна политехническэй үөрэҕинэн улуус үгүс ыччатын түмэр. Билигин дойдубут сайдыытыгар ыччаты инженернэй үөрэхтээһин биир сүрүн хайысха быһыытынан ааҕыллара оруннаах, кэскиллээх.

 

Мидена Петрова, Татьяна Дмитриева.