Ил Дархан Айсен Николаев 2023-2027 сыллары саха литературатын төрүттээччитэ, бөлүһүөк Алексей Елисеевич Кулаковскай – Өксөкүлээх Өлөксөй биэс сылынан биллэрбитэ.
Кулун тутар 16 күнэ – Өксөкүлээх Өлөксөй төрөөбүт күнэ. Бу күн «Таатта» литература-художественнай түмэлигэр (Хадаайы) Өксөкүлээх Өлөксөй балаҕанын көмүлүөк оһоҕуттан өрөспүүбүлүкэ үрдүнэн көстөр быһа холбонуунан «Өксөкүлээх сардаҥата» уоту ылыы буолла.
Таатта улууһун баһылыга Айаал Бурцев, Өксөкүлээх Өлөксөй сиэнэ, РФ үөрэҕириитин туйгуна, СӨ үөрэҕириитин Бочуоттаах бэтэрээнэ, Таатта улууһун Бочуоттаах олохтооҕо Рива Реасовна Кулаковская Өксөкүлээх сардаҥатын Саха сиригэр сандаартылар.
Бу тэрээһиҥҥэ И.Г.Тимофеев аатынан Майа лиссиэйэ кыттыста, Өксөкүлээх сыдьаайа чүмэчи уотун умматта. Тэрээһин лиссиэй гуманитарнай кафедратын иһинэн утумнаахтык үлэлиир «Лира» литературнай кулууп чэрчитинэн 8-1, 9-2 кылаас үөрэнээччилэригэр ыытылынна. Оҕолор суруйааччы айымньыларын, олоҕун кэпсээнин бэлэмнэнэн кэлэн аахтылар, кэпсээтилэр. Бибилэтиэкэр Алена Рязанская, саха литературатын учууталлара Мидена Петрова, Тамара Слободчикова айар үлэтин, олоҕун кэпсээтилэр. А.Е.Кулаковскайга аналлаах кинигэни билиһиннэрдилэр.
Лиссиэй үөрэнээччилэрэ тэрээһинтэн үгүһү билэн, сүргэлэрэ көтөҕүллэн тарҕастылар.
